Dy ditë para ekzekutimit midis rrugëve ‘Sperxiou’ dhe ‘Peloponiso’ në Keratsini të Greqisë, 32-vjeçari shqiptar Rigert Dervishi ka bërë edhe postimin e fundit në rrjetin social Facebook, ku me anë të një shprehje apelon thotë se njeriu nuk duhet të dorëzohet kurrë.
“Vdekja nuk është humbja më e madhe në jetë. Humbja më e madhe është ajo që vdes brenda teje kur jemi ende gjallë. Asnjëherë mos u dorëzo”,- thotë Rigerti.
Nga postimet e tij kuptohet që i riu nga Kuçova është i martuar dhe ka tre fëmijë. Ai ka pasion udhëtimet dhe futbollin, ndërsa shfaqet shpesh në stadium teksa bën tifo për skuadrën e Olimpiakos.
Ndonëse policia nuk ka rënë ende në gjurmët e atentatorëve të shqiptarit, ka dyshime të forta që ekzekutimi në makinë të jetë bërë për larje hesapesh mes bandave kriminale. Burimet thonë se pikërisht larja e hesapeve, është edhe pista kryesore ku po heton policia, nisur edhe nga mënyra e ekzekutimit të tij.
Në vendngjarje hetuesit kanë gjetur 10 gëzhoja të kalibrit 9mm që janë derdhur mbi trupin e shqiptarit. Nga hetimet rezulton se ai u qëllua nga dy persona që udhëtonin në një tjetër automjet tip “Toyota”, ndërsa marrja në pyetje e dëshmitarëve okularë pritet të nxjerrë edhe detaje të tjera nga kjo ngjarje. /ma.me
