Një faqe në rrjete sociale me emrin “Italianët në Shqipëri” mbledh përshtypjet e turistëve që kanë vizituar këtë verë Sarandën dhe Ksamilin.
Këto dy destinacione, veçanërisht Ksamili kanë qenë shumë të lakuara në mediat ndërkombëtare muajt e fundit dhe kjo ka krijuar një fluks të pazakontë turistik.
Po si i jemi përgjigjur ne shqiptarët këtij interesi? Abuzimi me çmimet është ai që vihet re më së shumti.
Kjo edhe për shkakun se reklamimi i Shqipërisë në median ndërkombëtare është bërë bazuar në dy shtylla: Shumë bukur dhe shumë lirë.
E para është e vërtetë, por e dyta jo.
Një turiste ka postuar në faqen e sipërcituar disa foto nga raftet e një marketi në Sarandë, ku me sa duket ka kërkuar deodorant dhe merendina.
“Janë dyfishi i çmimeve në Itali. Kjo nuk është ajo që na është thënë dhe vazhdon të na thuhet se këtu ka çmime të lira. Më vjen keq por nëse vazhdojnë kështu, këta do ta humbin turizmin” – vëren ajo në postimin e publikuar nga Dita.
Postimet më poshtë janë të llojeve të ndryshme. Dikush thotë që ka vetëm mallra të importuar ndaj kanë këto çmime.
Dikush tjetër u qan hallin shqiptarëve dhe thotë se si ia dalin me 400 euro në muaj rrogë, kur këtu kushton 15 euro një panine me pak djath e proshutë.
Një tjetër i ve kapakun. Ai këshillon udhëtarët t’u rrinë larg marketeve dhe restoranteve në Sarandë e Ksamil dhe të shkojnë në furrat e rrugës ku mund të marrin “byrek dhe dhallë” për vetëm 1 euro./Dita
