Një person është mbytur në portin e Durrësit këtë të dielë, ndërsa trupi i tij është konstatuar nga Policia kufitare.
Burime jozyrtare bëjnë me dije se personi që ka humbur jetën është një shtetas i huaj, dyshohet sirian.
Në një foto që është bërë publike nga mediat, viktima shihet me çantën e shpinës në kurriz, në përpjekje për t’u larguar nga Shqipëria.
Paraprakisht burimet saktësojnë se në trupin e viktimës nuk janë gjetur shenja dhune, ndërsa trupi ka qenë i padekompozuar.
Mësohet se i riu ka tentuar që të kalojë ilegalisht në drejtim të Italisë, por në rrethana që nuk dihen ende është gjetur i mbytur.
Me mijëra emigrantë shfrytëzojnë Shqipërinë si pikë tranziti drejt Europës, por në disa raste ata janë viktima, qoftë të fatit, qoftë të trafikantëve që i braktisin, edhe pse kanë marrë në këmbim para për transportin e tyre.
Njoftimi i policisë: Më datë 30.05.2021, në Portin e Durrësit, në afërsi të barkave të peshkimit është gjetur i mbytur në ujë një shtetas i seksit mashkull, i paidentifikuar.
Menjëherë në vendngjarje kanë shkuar Efektivet e Policisë, ku nga kqyrja paraprake e kufomës nuk janë konstatuar shenja dhune.
Grupi hetimor po punon për identifikimin e personit dhe zbardhjen e plotë të ngjarjes.
/a.r
