Gjithnjë e më shumë personazhet VIP po zgjedhin biçikletat apo mjetet elektrike si mënyrë për të lëvizur në Tiranë. Shtimi i rrjetit të korsive të biçikletave dhe vendeve te parkimit ka bërë që jo vetëm qytetarët, por dhe personazhe të njohur të qarkullojnë me dyrrotak në rrugët e kryeqytetit.
Një prej tyre është dhe aktori i njohur Gazmend Paja, i cili është fotografuar në bulevardin “Dëshmorët e Kombit” duke lëvizur me scooter elektrik.
Duke qëndruar sportiv, Gazi shihet i veshur me një palë pantallona gri dhe një kanotiere të bardhë.
Numri i përdoruesve të biçikletave në Tiranë është shtuar ndjeshëm, sidomos vitet e fundit kur bota është përballur me pandeminë, apo me rritjen e çmimit të naftës për shkak të luftës në Ukrainë.
Bashkia e Tiranës në zbatim të strategjisë së transportit të qëndrueshëm në kryeqytet, parashikon sistemim e infrastrukturës së rrugëve dhe trotuareve sipas parimit të shpërndarjes së sipërfaqes së rrugës për çdo përdorues duke i dhënë prioritet mjeteve të shërbimit publik, lëvizjes me biçikleta dhe lëvizjes këmbësore.
Përdoruesit e biçikletave kanë tashmë vendin e tyre në shumë rrugë të kryeqytetit duke ndihmuar jo vetëm në uljen e trafikut ,por dhe në një jetesë më të shëndetshme.
