Me ftesë të Ministrit të Bujqësisë së Republikës Popullore të Kines, Han Changfu, u mbajt në Kunming, në datat 5-6 nëntor 2016, Forumi i 11-të i Tregtisë Bujqësore dhe Bashkëpunimit Ekonomik midis Kinës dhe vendeve të Evropës Qëndrore e Lindore.
Në forum, 16 vendet pjesëmarrëse paraqitën një informacion të përgjithshëm rreth marrëdhënieve tregtare bujqësore me Kinen dhe perspektivën e mëtejshme në inovacion dhe tregti.
Në fjalën e tij, zv.Ministri i Bujqësisë, Zhvillimit Rural dhe Administrimit të Ujrave, Roni Telegrafi, theksoi potencialet e bujqësisë shqiptare në përmbushjen e kërkesave specifike të tregut kinez. Vëmendje ju kushtua kushteve të favoreshme klimaterike, të cilat mundësojnë daljen e hershme në treg të produkteve shqiptare. Gjithashtu, një vëmendje e veçantë, si prodhime tejet konkuruese, iu dha vajit të ullirit dhe verës shqiptare.
Gjatë vizitës së tij, zv.Ministri Telegrafi u prit në takim nga homologu i tij kinëz, Qu Dongyu, të cilit i shprehu vullnetin për të intensifikuar marrëdhëniet e bashkëpunimit midis dy vendeve në fushën e bujqësise, si dhe interesin për rritje të mëtejshme të pranisë së produkteve bujqësore shqiptare në tregun kinez. Zv.Ministri Dongyu u shpreh se, ne tregun kinez ka interes për produktet shqiptare dhe se, ai është në gjëndje t’i përshtatet çdo lloj oferte, pavaresisht nëse ajo vjen nga një prodhues i madh apo i vogël.
