Kryeministri Edi Rama po merr pjesë në Forumin Ndërkombëtar në qytetin sudedez Malmo ku liderë nga e gjithë bota po diskutojnë mbi Kujtimin e Holokaustit dhe Luftimin e Antisemitizmit. Në fillim të forumit pjesëmarrësit kanë ndjekur kujtimet e mbijetuarve të Holokaustit të cilët iu kërkuan politikanëve më tepër përgjegjshmëri për një botë në paqe dhe të zhvilluar.
Kryeministri shqiptar do t’i drejtohet audiencës në këtë forum në sesionin e dytë plenar në orën 16:00 ndërsa në panelin e parë e ka marrë fjalën në fillim Kryeministri i Suedisë Stefan Löfven, Kryebashkiakja e qytetit te Malmö Katrin Stjernfeldt Jammeh, Presidenti i Këshillit Evropian Charles Michel, Presidenti i Francës Emmanuel Macron dhe Sekretari amerikan i Shtetit Antony Blinken.
Diskutantët kanë nënvizuar se sot, pak të mbijetuar kanë mbetur për të dëshmuar për tmerret e Holokaustit, genocidit rom dhe persekutimit ndaj grupeve të ndryshme etnike gjatë Holokaustit. Sipas liderëve që kanë marrë fjalën, komuniteti ndërkombëtar ka një detyrim të sigurojë që Holokausti të mbahet mend dhe që brezat e ardhshëm, që të reflektojnë mbi pasojat e tij për të parandaluar që kjo histori të mos përsëritet më kurrë. Ata kërkuan që brezat e rinj të tregojnë më tepër solidaritet dhe të ndëshkohet antisemitizmi që të mbështetet edukimi kundër gjuhës së urrejtjes.
/a.r
