U zhvillua në rajonin e Kepit të Palit stërvitja “Durrësi SAREX 16”, ku morën pjesë personeli dhe mjetet e Forcës Detare, Forcës Ajrore, Antikontrabandës Detare, Policisë Kufitare dhe të Emigracionit, Durrës, Qendrës Operacionale Ndërinstitucionale Detare dhe Inspektoratit të Peshkimit.
Qëllimi kryesor i kësaj stërvitjeje ishte trajnimi i forcave pjesëmarrëse për të zhvilluar operacione të kërkim – shpëtimit në det, në rast fatkeqësish dhe krizash të ndryshme humanitare.
Stërvitja kishte gjithashtu qëllim edhe rritjen e mëtejshme të kapaciteteve operacionale të institucioneve pjesëmarrëse, në zbatimin e ligjshmërisë në det, përmirësimin e standardeve të ndërveprueshmërisë ndërmjet mjeteve detare dhe ajrore dhe zbatimin e rregullave të ligjshmërisë në hapësirën detare të Shqipërisë.
Efektivët pjesëmarrës në stërvitjen “Durrësi SAREX 16” inskenuan një operacion kërkim – shpëtimi dhe kalimin e personave nga anija në helikopter. Pjesë e skenarit ishte edhe kundërshtimi nga ana e një anije të huaj e urdhrit të autoriteteve shqiptare si edhe refuzimi i saj për të kryer bordimin.
“Durrësi SAREX 16”, u ndoq nga afër nga zëvendësministri i Mbrojtjes, Petro Koçi, komandanti i Forcës Detare, gjeneral brigade Ylber Dogjani, komandanti i Forcës Ajrore, gjeneral brigade Vladimir Avdiaj, komandanti i Forcës Tokësore, gjeneral brigade Nazmi Cahani, përfaqësues të pushtetit vendor dhe të institucioneve pjesëmarrëse në këtë stërvitje.
Gjithashtu në këtë demonstrim morën pjesë edhe dy përfaqësues të Organizatës Ndërkombëtare Detare (IMO)./a.m.
