Nisma për “Fondin e Komunitetit” është dyfishuar këtë vit dhe është bërë e mundur të rikonstruktohet pallati i shtatë në kryeqytet në rrugën “Njazi Meka” në njësinë 4 në Tiranë, deklaruar sot kryetari i Bashkisë së Tiranës, Erion Veliaj.
Kryetari i Bashkisë së Tiranës, Erion Veliaj dhe deputeti i PS-së, Sadri Abazi, inspektuan një pallat para-fabrikat në rrugën “Njazi Meka” në njësinë 4, i cili u rikonstruktua nga komuniteti i banorëve, në bashkëpunim me bashkinë.
“Në një tjetër bllok pallatesh në njësinë 4, e cila është zhvilluar shumë vitet e fundit, u gjet mirëkuptimi mes banorëve dhe bashkëpunuan për të rregulluar ndërtesat para-fabrikate, që fusnin brenda ç’sillte moti jashtë. Sot pallatet janë veshur me kapotë, gjysmën banorët, gjysmën Fondi i Komunitetit”, tha Veliaj, teksa shtoi se ky është pallati i shtatë i cili përfiton nga projekti i Bashkisë së Tiranës.
Më tej Veliaj shtoi se “një te Libri Universitar, një te Komuna e Parisit, një te Njësia 4, që do të thotë se kur komuniteti bëhet bashkë, bashkia përgjigjet. Mund të jetë një cep i Tiranës ose një tjetër, mund të jetë brenda unazës ose jashtë, pallatet të reja ose të vjetra. Fakti që këto projekte janë shpërndarë në mënyrë të njëtrajtshme në gjithë bashkinë, do të thotë se ku ka bashkëpunim, ne do përgjigjemi”.
Veliaj nënvizoi se përmirësimi i infrastrukturës ka sjellë edhe rritje të vlerës së pronës për qytetarët.
“Automatikisht ulet 1/3 e shpenzimeve të energjisë elektrike. Është një shpenzim që lan veten sepse të kursen faturën. Jo vetëm kaq, por shtohet vlera e pallatit. Mjafton të krahasosh një pallat para-fabrikat të paprekur, me një pallat para-fabrikat të sapoveshur me kapotë; edhe estetikisht rritet vlera e pronës. Është i njëjti pallat, por ama, vetëm fakti që duket ndryshe, dhe ka këto shpenzime të kursyera, e bën një pallat më të vlefshëm”, shtoi ai.
Kryebashkiaku theksoi se është e domosdoshme që pallatet të zgjedhin kryesitë dhe administratorët e tyre.
“Nëse kemi bashkëpunim, pra fillimisht të zgjedhim administratorët, siç kanë bërë këto pallate, mund të bëjmë bashkë gjëra që më përpara nuk mund të bëheshin. Arsyeja pse bashkia e ofron këtë mundësi është që të nxisë komunitetet të bashkëpunojnë. Ajo që u propozojmë banorëve, edhe të lagjeve të tjera, është që të bëhen bashkë dhe administratori të vijë të aplikojë. Këtë vit i kemi dyfishuar fondet, do të thotë që mund të bëjmë dy herë më shumë pallate”, u shpreh Veliaj.
Ndërsa, deputeti i PS-së, Sadri Abazi, vlerësoi angazhimin e kryebashkiakut Veliaj për kthimin e Tiranës në një kantier ndërtimi në shërbim të qytetarëve. /b.d
