Vijon prej më shumë se një ore mbledhja e katërt e deputetëve të grupit të Sali Berisha dhe të grupit të deputetëve mbështetës së Gazment Bardhit.
Në këtë mbledhje moren pjesë 28 deputetë, mungon dhe deputetja Jorida Tabaku. Nuk dihet arsyeja se pse kjo e fundit mungon.
Në fokus të mbledhjes ishin disa çështje kryesore, ku prevalon diskutimi për Kosovën si dhe miratohet një rezolutë që PD ka dorëzuar në Kuvend.
Mbetet për t’u parë nëse Kuvendi do të dalë me një rezolutë të përbashkët, pra PS dhe PD për çështjen e Kosovës.
Në mbledhje gjithashtu u diskutua për ngritjen e komisioneve hetimore parlamentare, dy prej të cilave janë rrëzuar, si ajo e tenderave për shëndetësinë dhe ajo për sistemin TIMS.
Menjehere pas mbledhjes ish-kryeministri Sali Berisha deklaroi sot se kryeministri Edi Rama po përgatit atentatin më të rëndë në historinë 32-vjeçare të pluralizmit politik shqiptar.
Sipas tij, Rama po përgatitet të marrë përsipër përdorimin e votave për t’i emëruar opozitës përfaqësuesin e saj.
“Rezoluta e paraqitur me mocion për Kosovën me urdhër të Ramës e kanë hequr nga rendi i ditës, sepse i diskredituar ai nuk pranon të ketë një diskutim të hapur për situatën shqetësuese në Kosovë të krijuar nga Beogradi dhe padyshim Rusia.
Nga ana tjetër ka të dhëna se ai po përgatit atentatin më të rëndë në historinë 32-vjeçare të pluralizmit politik shqiptar. Po përgatitet të marrë përsipër përdorimin e votave për t’i emëruar opozitës përfaqësuesin e saj.
Opozita është e vendosur të qëndrojë në të drejtën e saj si opozitë dhe në mbrojtje të opozitarizmit. Në mbrojtje të votës të të gjithë atyre që votuan kundër kësaj qeverie. Në mbledhje u diskutuan dhe çështje të tjera. Ramë në ujdi për të gjitha qëndrimet dhe mund t’ju them se ishte një mbledhje shumë e frytshme”, tha Berisha./m.j
