Fondi Monetar Ndërkombëtar ka rishikuar në rënie ekonominë shqiptare gjatë këtij viti në 2.7%, nga 3% që ishte vlerësimi i mëparshëm.
Në raportin e tetorit për “Perspektivën e Ekonomisë Globale”, sipas FMN-së edhe për vitin 2016, rritja ekonomike e Shqipërisë parashikohet në rënie. FMN parashikon që Shqipëria të rritet me 3.4%, nga 4% që ishte pritshmëria në raportin e muajit prillit.
Edhe në terma afat-gjatë, deri në vitin 2020 vlerësimi është në ulje në 4.2%, nga 4.5% që parashikohej në prill.
Krahasuar me vendet e rajonit, Shqipëria lë pas vetëm Serbinë, në kontekstin e rritjes më të ulët ekonomike, që parashikohet të rritet me 0.5% nga -0.5% që ishte vlerësimi i prillit. Maqedonia, Kosova dhe Mali i Zi pritet të rriten me 3.2 % secila.
Fondi Monetar Ndërkombëtar rishikoi me ulje parashikimet për rritjen ekonomike globale për këtë vit. Rritja u reduktua në 3.1 përqind, nga 3.3 përqind që ishte një parashikim i muajit korrik. Në 2016, parashikimet flasin për një rritje të ekonomisë globale nën 3.8 përqind.
