Fondi Monetar Ndërkombëtar është duke e paralajmëruar Qeverinë e Kosovës se po e vë në rrezik buxhetin e shtetit. Ky institucion ndërkombëtar ka kërkuar nga kryeministri Isa Mustafa që të ketë kujdes me paratë që po i ndan për veteranët.
FMN thotë se në buxhet janë parashikuar 60 milionë euro për këtë kategori, derisa shpenzimet mund të shkojnë deri në 100 milionë. Në ekzekutiv nuk kanë pranuar të flasin për këtë çështje. Kurse, Ministria e Punës dhe Mirëqenies Sociale ka treguar se në vazhdimësi ka pasur kontakte me Fondin Ndërkombëtar Monetar. Derisa, veteranët thonë se pensionet e tyre nuk bën të preken, referon Express.
Pensionet e veteranëve të Ushtrisë Çlirimtare të Kosovës janë bërë mollë sherri për Qeverinë e Kosovës dhe Fondin Monetar Ndërkombëtar, kjo për faktin se ish-ushtarët e UÇK ‘së janë duke e rrezikuar fort qëndrueshmërinë e buxhetit të shtetit.
E për t’i eliminuar telashet me paratë e shtetit, FMN po kërkon nga qeveria e Kosovës që të ndërhyjë menjëherë. FMN ka bërë me dije se numri i madh i veteranëve të UÇK’së ka tejkaluar edhe paratë e planifikuara në buxhet për afro 40 milionë euro.
“Tani ka më shumë se 30.000 veteranë të luftës të certifikuar dhe më shumë se 23.000 prej tyre tani po marrin të ashtuquajturin pension veteran. Kjo është kundër vlerësimit fillestar të 15.000-20.000 veteranëve të luftës dhe 13.000 pensioneve të veteranëve të luftës. Kuptohet, shpenzimet e ndërlidhura tani janë shumë më të larta nga parashikimet. Në fakt, kostoja vjetore e të gjitha skemat të përfitimeve të lidhura me luftën mund të arrijë 100 milionë euro ose më shumë nga viti i ardhshëm, ndërsa buxheti për vitin 2016 është ndarë 60 milionë euro”, thuhet në përgjigjen e FMN’së dhënë për Gazetën Express.
FMN ka bërë me dije se 60 deri 75 milionë duhet të shpenzohen këtë vit për të gjitha skemat sociale të ndërlidhura me luftën. (b.an)
