Të martën, Fondi Monetar Ndërkombëtar (FMN) u shpreh se ekonomia kineze pritet të rritet 8.1 % në vitin 2021.
Parashikimi, i bërë në raportin e fundit “Perspektiva e ekonomisë botërore” të publikuar nga kjo organizatë, është 0.2 pikë përqindjeje më i lartë se shifra e shpallur para gjysmë muaji. Njëkohësisht, parashikohet se ekonomia globale do të rritet 5.5 % këtë vit.
Të martën, kryeekonomistja e FMN-së Gita Gopinath u shpreh në një konferencë shtypi virtuale se në 3-mujorin e katërt të vitit 2020, Kina u kthye në nivelet e parashikimeve para pandemisë, përpara të gjitha ekonomive të mëdha.
Ajo shtoi se rritja e parashikimit për vitin 2021 pasqyron efektet pozitive të fillimit të vaksinimit në disa vende dhe përkrahjen shtesë me politika në fund të vitit të kaluar në disa ekonomi, si ShBA-ja e Japonia.
Sipas të dhënave të Zyrës së Statistikave të Kinës, në tre muajt e fundit të vitit të kaluar PBB-ja e ekonomisë së dytë më të madhe në botë u rrit 6.5 %.
Rritja ekonomike në atë tremujor e çoi rritjen vjetore të vendit në 2.3 %, gjë që tregon se Kina realizoi rritje pozitive vjetore në 2020-n, ndërsa shumë vende të tjera vazhduan të përballen me pandeminë.
Por mbetja prapa e rimëkëmbjes së konsumit dhe shpërthimi kohët e fundit i rasteve të COVID-19 në disa qytete të Kinës Veriore kanë ngjallur shqetësimet e publikut për rimëkëmbjen ekonomike. Sipas të dhënave zyrtare, në vitin 2020 vëllimi i shitjes me pakicë të mallrave të konsumit në Kinë u ul 3.9 % në krahasim me vitin 2019, hera e parë e tkurrjes së shitjes me pakicë që nga viti 1968
Të martën, guvernatori i Bankës Popullore të Kinës, z. Yi Gang, u shpreh se politika monetare e Kinës do të ruajë qëndrueshmërinë për të mbështetur rritjen ekonomike dhe se banka qendrore nuk do të tërhiqet para kohe nga politika mbështetëse.
Yi Gang parashikoi se rritja ekonomike e Kinës sivjet do të qëndrojë në sferën normale të rritjes para pandemisë.
