Si moderatore e “Jo vetëm modë”, Floriana Garo të lë përshtypjen e vajzës që s’do ta trazojë shpirtin me njerëz fatkeq dhe të braktisur nga më të afërmit e tyre. Por, në këtë atmosferë festive të fundvitit, na vërteton të kundërtën. Duke shfaqur ndjeshmërinë për kauza të tilla, Garo është bërë pjesë e klanit të bamirësisë bashkë me deputeten e Partisë Socialiste, Esmeralda Shkjau, dhe reperin e famshëm, Rigels Rajku (Noizy).
Në këtë rrëfim për gazetën “Panorama”, Floriana na rrëfen se realiteti i dhimbshëm që ka prekur, po e inspiron të marrë një vendim të rëndësishëm për jetën e saj, pikërisht të adoptojë një fëmijë…
Me anë të një statusi në Facebook, reperi Noizy ka folur për klanin e tij të bamirësisë, bashkë me ty dhe deputeten e Partisë Socialiste, Esmeralda Shkjau. Si u bëtë bashkë, tre personazhë publikë nga Durrësi, për të ndihmuar njerëzit dhe familjet në nevojë?
Tre personazhe publikë, por me një koordinator shumë të rëndësishëm, Leonard Kadrimin, që na mblodhi të gjithë bashkë, duke ditur ndjeshmërinë që ne kemi ndaj kësaj kauze.
Kur nisi miqësia juaj, kush ftoi kë?
Të katërt ne kemi qenë edhe vjet pjesë e një mbrëmjeje bamirësie në ndihmë të shtëpisë së foshnjës në Durrës. Këtë vit e vazhduam misionin me familjen Shkreli dhe Hasa.
Ju vini nga tri fusha të ndryshme; ti nga televizioni, Noizy nga muzika dhe Esmeralda Shkjau nga politika. Jeni miq jashtë këtij misioni, pra çfarë ju bashkon në aspektin shoqëror?
Ndjeshmëria ndaj shtresës në nevojë dhe mundësia për të ndikuar te ndjekësit tanë, secili në fushat përkatëse. Unë dhe Esmeralda jemi takuar gjatë xhirimeve të emisionit që unë kam bërë për të vitin e kaluar, ndërkohë me Noizy-n jam takuar në një mbrëmje bamirësie për fëmijët jetimë të “Zyber Hallullit”, në vitin 2013.
Ku do të konsistojë puna juaj në këtë nismë? Ju do të ofroni para vetë, apo do të grumbulloni të holla dhe ndihma nga të tjerët?
Sigurisht që ne kemi kontribuar edhe vetë me para dhe të mira materiale, por kemi pasur një ndikim të madh edhe te donatorë dhe biznesmenë të ndryshëm, të cilët i kemi nxitur të kontribuojnë, si “Eco Market” për ushqime, “Brunes” për pllakat e shtëpisë, “Hotel Palace” për punësim të një vajze, “Sigal” për sigurimin shëndetësor etj.
Çfarë keni menduar për këtë atmosferë fundviti, si do t’i gëzoni fëmijët?
Duke u zbukuruar pemët e Vitit të Ri në shtëpitë që u kemi rindërtuar, dhe duke e mbushur tavolinën e tyre me ushqime, të cilat nuk i kanë gëzuar kurrë si gjithë të tjerët.
Mund të zbulosh disa emra të tjerë personazhesh të njohur, që i janë bashkuar tashmë klanit tuaj të bamirësisë?
Prezantuesja Klea Huta ofroi ta moderonte mbrëmjen “gala” dhe artistja e talentuar, Frederika Muça, e zbukuroi mahnitshëm sallën e “Hotel Palace”, duke krijuar një atmosferë të paharrueshme për të gjithë të ftuarit, por sidomos familjet Hasa dhe Shkreli, të cilët përjetuan një ëndërr.
Gjatë një viti, sa shpesh shkon të vizitosh një shtëpi fëmije, dhe ke krijuar marrëdhënie të ngushta me ta?
Kam shkuar disa herë të vizitoj fëmijë jetimë në Durrës dhe në Tiranë, por tani jam lidhur më shumë me fëmijët e familjes Shkreli, e sidomos me vajzën e madhe, Melisën, rrugën e së cilës dëshiroj ta ndjek, meqenëse nëna e saj e ka braktisur.
Të ka shkuar në mendje të birësosh një fëmijë të braktisur, dhe nëse po, dëshiroje të ishte djalë apo vajzë?
Po. Më ka shkuar në mendje disa herë. Nëse do të arrij t’i krijoj kushtet për një familje të ngrohtë, me gjithë zemër do ta adoptoja një fëmijë, qoftë djalë apo vajzë.
