Halil Shyti, nga fshati Llakaj në Memaliaj, i punësuar një vit më parë si roje në një parcelë me 1300 rrënjë kanabis ka dalës sot para Gjyaktës.
Ai rrezikon një dënim të rëndë, pasi në korrik 2016, qëlloi me armë në drejtim të policisë, teksa efektivët e saj po afroheshin për të shkatërruar parcelat me drogë. Përpara Gjykatës së Krimeve të Rënda, i pandehuri e pranoi akuzën e Prokurorisë dhe tha se ndihet thellësisht i penduar.
Më tej, ai u mundua të binte trupën gjykuese, se ditën e ngjarjes, kishte konsumuar shumë hashash dhe ishte ndjerë tejet i frikësuar kur kishte parë policët, ndaj kishte qëlluar me armë gjahu në drejtim të tyre.
Prokuroria bën të ditur se nga plumbat mbeti i plagosur lehtë një efektiv i policisë. I riu Shyti, u prangos pak orë pas ngjarjes dhe pranoi ishte i punësuar si roje pranë parcelave.
Në rastin e tij, prokuroria nuk është mjaftuar vetëm me akuzën e vrasjes së mbetur në tentativë ndaj punonjësit të policisë, por ka ngritur mbi supet e 22-vjeçarit edhe akuzat e kultivimit të hashashit, prodhimit dhe mbajtjes pa leje të armëve të gjuetisë, si dhe vjedhjes së energjisë elektrike.
Sipas Prokurorisë, me qëllim që të furnizonte me energji pompat e ujit që ujiste parcelat, ai kishte lidhur në mënyrë të paligjshme energjinë elektrike.
I pandehuri po gjykohet me procedurë të shkurtuar, ndërsa babai i tij, do të përgjigjet përpara gjykatës së Gjirokastrës për akuzën e kultivimit të hashashit.
Ndërkohë, me kërkesë të Prokurorisë, Gjykata ka caktuar masën e sigurisë “arrest me burg” për Albano Ramën, që dyshohet si pronar i parcelave me hashash, por ai ende nuk është arrestuar nga policia./BW/
