Nisen nga Cërriku për në News 24, në Tiranë, për të denoncuar dhunën, sipas tyre, nga dy mësuese. Bëhet fjalë për pesë nxënës së klasës së 5-të të shkollës 9- vjeçare “7 Marsi”, të cilët hynë në studion e lajmeve për të akuzuar mësueset e fillores për dhunim, pasi njëri nga nxënësit ka tentuar t’i filmojë me kamerën e celularit.
Sipas tyre, mësueset Fatbardha Shabani dhe Suzana Dinoshi të shkollës së tyre i kanë dhunuar mëngjesin e së enjtes.
Mësohet se nxënësit janë nisur në drejtim të kryeqytetit, pasi mësuesja kujdestare Mjaftoni Ago u ka pajtuar një taksi dhe duke i orientuar për të bërë akuzat nga News 24.
Por këtu ndodh skandali i dytë, pasi mësuesja nuk i shoqëroi fëmijët drejt Tiranës në këtë udhëtim, por nuk lajmëroi as prindërit e tyre.
E kontaktuar nga “Panorama”, Fatbardha Shabani, mësuesja e cila akuzohet për dhunë ndaj fëmijëve, ka treguar ngjarjen që, sipas saj, akuzat e bëra ndaj saj dhe koleges janë thjesht inate personale që mësuesja e klasës së pestë ka me to. Fatbardha ka 40 vjet përvojë pune si mësuese dhe më shumë se 20 vite në qytetin e Cërrikut.
“Ishte mëngjes dhe unë bashkë me kolegen time ishim në sallonin brenda shkollës dhe po hanim nga një banane. Në atë moment në drejtimin tonë vjen një nxënës i klasës së pestë dhe na filmon me celular. E thirrëm nxënësin, por ai iku menjëherë në klasë dhe ne morëm motrën e tij që është në klasë të 9-të dhe i thamë për atë që bëri vëllai i saj.
Motra e mori vëllain dhe e solli te klasa e mësuese Suzanës. Ne ishim duke e pyetur se pse na ka filmuar, por në këtë moment dëgjojmë zëra nga jashtë klasës. Të gjithë nxënësit e klasës së pestë, shokët e djalit, ishin pas derës dhe thërrisnin: ‘Mos na e dhunoni shokun!’, ‘Lëshojeni shokun!’”, tregon Shabani.
Sipas saj, pas këtij momenti ka parë mësuesen e tyre, Mjaftoninë, e cila i nxiste që të bërtisnin dhe të qanin, sikur i kisha rrahur unë.
“Shkuam te drejtoresha dhe ajo i tha të sqaroheshim me qetësi, por Mjaftonia bërtiste:
‘Unë nuk ju kam frikë’, ‘Ju mbani anën e këtyre mësueseve’. Më pas, ajo bashkë me nxënësit shkoi për t’u ankuar në Drejtorinë Arsimore. Por më vonë më lajmëruan se i kishin parë fëmijët në televizor”.
Mësuese Fatbardha Shabani e argumenton këtë ngjarje me konfliktet profesionale që ka pasur me mësuesen Mjaftoni Ago.
“Në fakt, ajo konfliktohet me të gjithë kolegët, por nuk e mendoja që do të shfrytëzonte fëmijët për inatin e saj”.
Mësuesja e nxënësve, Mjaftoni Ago, pasi është marrë në pyetje nga Policia e Cërrikut, është lënë e lirë. Ajo ka rrëfyer variantin e saj, duke thënë:
“Sot shkova pak me vonesë në shkollë, dhe kur hyra në klasë pashë fëmijët duke qarë. I pyeta se çfarë kishin dhe ata më thanë se i kishte dhunuar me mjete të forta mësuese Bardha. Bashkë me fëmijët shkova te drejtoresha, por ajo më injoroi. Më pas, bashkë me fëmijët shkova në Drejtorinë Arsimore. Drejtoresha i mori pak në pyetje nxënësit, pasi nuk i ka marrëdhëniet e mira me mua”.
Konstatimit se nuk është ligjore që të dërgojë nxënësit vetëm për në Tiranë, Mjaftoni Ago e ka pranuar këtë fakt dhe ka thënë se “nuk e mendova kaq thellë, ndoshta kam bërë gabim, por do të shkoja edhe vetë pas tyre”.
Panorama/d.i.
