Dy ditë më parë ish badigardi i Sali Berishës, Izet Haxhia shkruante në faqen e tij në Facebook se në vitin 1992 ka pasur një skenar për të vrarë Aleksandër Meksin dhe ideatori ishte pikërisht ish Presidenti i asaj kohe.
Sipas tij ishte planifikuar të rrëzohej avioni që do të sillte Meksin në Tiranë nga Roma.
Ngjarjen e konfirmoi dje edhe ish kryeministri Meksi, por pa dhënë detaje të saj.
Ndërsa sot, djali i ish kreut të qeverisë, Endri Meksi flet për “Dita” për natën kur po e priste të atin në Rinas dhe papritur ikën dritat.
“Në avion ishin Genc Ruli, Gjergj Kondo dhe Fidel Ylli, përveçse Aleksandër Meksit. Nga Roma u nisën për arsyen e thjeshtë se nuk kishin çfarë të bënin më aty.
Unë ndodhesha në Rinas atë pasdite. Ishim në hapësirën e shërbimeve qeveritare bashkë me rojet dhe shoferët e makinave. Nuk arrij të kujtoj kush ishin të tjerët, por kishte edhe njerëz të tjerë.
Na njoftuan papritmas se duhet të dilnim në pistë sepse nuk kishte drita dhe duhet të ndriçonim pistën me dritat e makinave.
Motivi i mungesës së dritave na u tha se ishte dëmtimi i llambave në tokë prej deleve dhe lopëve që kalonin lirshëm në aeroport.
Nga ky detaj më vjen të mendoj se nuk ishte diçka e parashikuar, sepse do ishim pozicionuar kohë më parë.
Në fakt u pozicionuam gabim, pavarësisht se nuk u fol më për këtë ngjarje.
Them gabim sepse kur avioni po ulej, unë vura re që po ndriçonim kundrejt avionit, dmth ishim përballë me të.
Pozicionimi i keq besoj se ishte arsyeja pse avioni takoi tokën me rrotën e parë, e cila u thye në momentin e impaktit.
Kuptohet, përveçse faktit që nuk kishte drita aspak.
Avioni vazhdoi deri në fundin e pistës me zvarritje dhe përplasje. Pati shumë shkëndija, por jo zjarr”.
“Pasagjerët nuk pësuan asnjë dëmtim. U fol më vonë se avioni nuk shërptheu sepse i kishte serbatorët në krahë. Nuk e di sa ka qenë e vërtetë, sepse në realitet nuk u mor askush me atë histori”.
“Në lidhje me çfarë thotë Izeti, në fakt nuk kam asnjë info, sepse nuk është folur më për këtë histori. Por një detaj e kujtuam pas këtij shkrimi, ishte që Bashkim Kopliku erdhi për vizitë menjëherë në shtëpinë tonë.
Nuk mund të them se kishin marrëdhënie të afërta duke qenë se marrëdhëniet në qeveri midis tij dhe Leka Meksit ishin konfliktuale, por as nuk jam në gjendje të jap një opinion sot mbi atë çfarë u tha nga Izeti”.
“Por as nuk habitem! Ka detaje te 1996-1997-a që tregojnë akoma më shumë. Ndoshta për herë tjetër”.
