Ish-drejtori i Arkivave në Ministrinë e Brendshme, Kastriot Dervishi ka publikuar arsyet se përse u dënua këngëtarja Alida Hisku, e cila së fundmi ngjalli debate me librin ku thoshte se ishte përdhunuar gjatë regjimit komunist.
Sipas Dervishit, cituar nga Panorama, i cili ka patur akses në arkivat e shtetit, Alida Hisku është dënuar për disa të vërteta që ajo ka shkruar në ditarin e saj kur zhvillonte praktikën mësimore në Konispol në vitin 1982.
“Alida Hisku zhvilloi praktikën mësimore në Konispol nga data 19.5.1982 deri më 12.6.1982. Ajo bënte pjesë në grupin e katërt të vitit të parë të shkollës së partisë. Guxoi të shkruajë disa të vërteta. Fjalët që ka shkruar në ditarin e saj të kallëzuara fillimisht te pedagogët, kanë qenë:
-“Hipëm në tren në orën 5.30 për t’u nisur në skëterrë”.
-“Vajtëm në Konispol dhe hëngrëm bukëzezën”.
-“Hëngra drekën si menuja e burgut dhe tani e shtrirë mbi këtë qivur të mykur”.
-“Ky krevati është si i lagur dhe i vjen era myk, megjithatë, jam e detyruar të fle në të”.
-“Shkuam në një mbledhje budallenjsh që zgjati gjithë ditën si për inatin tonë”.
-“Më duke vetja se më kanë sjellë për riedukim”.
Këto janë fjalët e këngëtares, cituar nga Dervishi në faqen e tij në Facebook.
PANORAMA
