Ministria e Financave ka nxjerrë në ankand pronat e tre ish-firmave piramidale Vefës, Kamberit dhe Xhaferrit. Sipas publikimit zyrtar, ankandi do të zhvillohet me 1 nëntor dhe do të jetë i hapur. Bëhet fjalë për disa pasuri të paluajtshme, në pronësi të këtyre firmave që janë konfiskuar nga shteti. Në ankandin e parë do të shitet një apartament banimi në Berat, në pronësi të Shoqërisë ‘Xhaferri”.
Vlera fillestare e ankandit do të jetë 1 milionë lekë. Ankandi i dytë i përket dy pasurive në pronësi të firmës “Kamberi”. E para është një njësi tregtare në Vlorë, me vlerë fillestare 4.2 milionë lekë, ndërsa e dyta është Ish-Pularia e Fshatit Grize,në Fier me vlerë fillestare 12.2 milionë lekë. Ankandi i tretë parashikon shitjen e një vile dy katëshe në Tiranë, në Rrugën Aleksandër Moisiu, me vlerë fillestare 11 milionë lekë, në pronësi të Edmond dhe Artan Alimuçaj.
Pasuritë në fjalë, janë të paktat që kanë mbetur pas konfiskimit të pronave të ish firmave piramidale dhe ndarjes së një pjese prej tyre. Skemat piramidale në Shqipëri filluan aktivitetin e tyre në vitin 1991, duke sjellë si pasojë Viti tragjik 1997 me falimentimin e rreth 25 firmave të cilat grumbulluan rreth 1.2 miliardë dollarë kursime të shqiptarëve.
Firma e parë ishte ajo e Hajdin Sejdisë, që u arratis në Zvicër me disa miliona dollarë. Firma “Sude” u krijua në vitin 1993 nga Maksude Kadëna dhe ekzistoi në gjysmë-ilegalitet deri në vitin 1996. “Suden” e ndoqën rreth 24 firma të tjera, ku më të fuqishmet ishin VEFA, “Gjallica”, “Demokracia Popullore” -Xhaferri, “Populli”, “Cenaj”, “Silva”, “Kamberi”, “Univers”, “Global Foods” etj.
ma.me
