Linjat energjetike janë dëmtuar dhe shtëpitë janë përfshirë nga ujërat si pasojë e reshjeve të stuhisë “Fiona” që goditi bregun e Kanadasë. Evente të tilla meteorologjike janë të rralla në Kanada dhe autoritetet thanë se, stuhia ishte diçka që nuk e kishin parë kurrë më parë.
“E di që është një situatë shumë e vështirë për shumë njerëz që kanë parë shtëpitë e tyre të shkatërrohen. Por jam i sigurt se këta njerëz e dinë se nuk janë vetëm dhe se ne do të jemi pranë tyre. Ne jemi këtu për të ndihmuar përmes materialeve bazë, përmes forcave të armatosura, përmes pajisjeve speciale. Po punojmë për të shtuar edhe personelin e vendosur në provinca për t’u përballur me situatën”-tha Justin Trudeau, kryeministër i Kanadasë
Në provincën Nova Scotia është dërguar ushtria për të ndihmuar në operacionet e pastrimit. Ajo dhe provinca të tjera përjetuan erëra që frynin deri në 160 km/h, shoqëruar me shira dhe përmbytje masive, që kanë lënë pa elektricitet disa qindra mijëra banorë.
Situatë alarmante është edhe në provincat e tjera si në Nju faund Lend, Nju Brunsvik, në disa pjesë të Kebekut, si dhe në ishullin Princi Edward. Qeveria ka nxjerr ushtrinë në lëvizje për të pastruar rrugët dhe ardhur në ndihmë banorëve.
Më herët gjatë javës, stuhia “Fiona” u përplas në Puerto Riko dhe në Republikën Domenikane, duke shkaktuar dëme të shumta në infrastrukturë dhe duke lënë banorët përveç se pa elektricitet edhe pa ujë të pijshëm.
