Deputetët e maxhorancës kanë kundërshtuar dje projektligjin e propozuar nga ministri i Jashtëm, Ditmir Bushati, që ka të bëjë me “marrëveshjet ndërkombëtare”. Në mungesë të opozitës në Komisionin e Ligjeve, oponencën ligjit ia kanë bërë vetë socialistët.
Relatori i projektligjit, Bashkim Fino, e kundërshtoi draftin e Bushatit, duke thënë se me këtë nismë barazohet roli i Presidentit me atë të Kryeministrit, çka sipas tij bie në kundërshtim me Kushtetutën. Fino tha në argumentin e tij se nëse drafti do të miratohet në Parlament sipas variantit të Ministrisë së Jashtme, atëherë Presidenti do ta kthejë sërish në Kuvend.
“Dua të jem korrekt me vendimin e Gjykatës Kushtetuese, për marrëveshjet politike Presidenti është fuqiplotë dhe i jep fuqi edhe Kryeministrit, edhe ministrave. Në fjalën tuaj ju e barasvlerësuat Presidentin dhe Kryeministrin dhe lamë më pas ministrat e tjerë me radhë. Thelbi i ndërhyrjes që bëra, që të mos krijojmë asnjë problem me Presidentin, ai është i detyruar të japë pëlqimin, sepse fundja janë marrëveshje, ekonomike, politike, tregtare, të cilat nuk ka arsye që mos të japë pëlqimin. Unë mendoj se kjo duhet të sqarohet, që të mos kemi asnjë lloj problemi, që as Presidenti, kur ta miratojë Kuvendi, të mos na e kthejë mbrapsht një ligj të tillë”, tha dje Fino.
Në qëndrimin e tij, Fino ka theksuar se drafti i hartuar nga MPJ përmbante kontradikta serioze në nenet e tij. Sipas tij, në nenin 6, njihet e drejta e Presidentit për të dhënë plotfuqinë për marrëveshje ndërkombëtare, ndërkohë që në një nen tjetër e përjashton atë.
“Presidenti ka fuqinë të autorizojë ty, Kryeministrin, ministrin e Jashtëm dhe ministrat e tjerë për të firmosur marrëveshje politike. Po çfarë thoni ju te pika 5 e nenit 6: “Përjashtohen nga pajisja me plotfuqi për nënshkrimin e marrëveshjeve ndërkombëtare: a) Presidenti; b) Kryeministri; c) Ministri i Punëve të Jashtme; ç) Ambasadori i misionit diplomatik me shtetin ose organizatën ndërkombëtare ku është akredituar”. D.m.th., në një vend ju jeni me nenin 121 të Kushtetutës, ndërsa brenda të njëjtit ligj ju i përjashtoni. Nuk keni ju të drejtë të përjashtoni”, tha dje Fino.
Kritikat e socialistit për projektligjin e qeverisë kanë vazhduar dhe për marrëveshjet grante, që qeveria i dërgon për miratim në Parlament. Sipas Finos, miratimi i shumave të vogla prej 30 mijë eurosh si grante nga 140 deputetë i heqin seriozitetin Kuvendit. “Po si ka mundësi një ministër Financash merr hua në emër të të gjithë shqiptarëve, në emrin tonë dhe të deputetëve, dhe ju më sillni mua 30 mijë dollarë dhe më thoni bëhu pis dhe ti si deputet dhe ngri dorën që të miratosh grantin për 30 mijë dollarë?! Kjo nuk ka logjikë! A do t‘ia japim seriozitetin këtij Parlamentit që të votojë për gjëra të rëndësishme dhe jo për 30 mijë dollarë?”, tha ai.
Nga ana e tij, ministri Bushati është shprehur i hapur që të diskutohen nenet e projektligjit, në mënyrë që të korrigjohen vërejtjet e deputetit Fino. Dje Komisioni i Ligjeve e ka miratuar vetëm në parim nismën, duke shtyrë diskutimin nen për nen.
Bushati: S’kemi qëllim t’ju bëjmë pis
Ministri i Jashtëm, Ditmir Bushati, tha dje se projektligji nuk ka për qëllim të bëjë pis deputetët, por sipas tij marrëveshjet me implikim financiar duhet të votohen në Kuvend. “Për grantet dhe huat, nuk është në këndvështrimin tonë çështja e të bërit pis. Neni 121 ka një përcaktim të qartë për marrëveshjet që sjellin implikime financiare. Implikim financiar është dhe 1-lekëshi, po ashtu dhe 30-milionëshi. Nëse do të ketë një vendim të Gjykatës Kushtetuese për këtë çështje, edhe ne do e kishim reflektuar”, tha Bushati.
FATION BINJAKU
