Shtetet e Bashkuara u kanë bërë të ditur aleatëve evropianë se duan që ata të vazhdojnë të blejnë armë të prodhuara nga Amerika. Reagimi vjen mes lëvizjeve të fundit nga Bashkimi Evropian për të kufizuar pjesëmarrjen e prodhuesve amerikanë në tenderët e armëve, citon Agjencia e Lajmeve Reuters.
Mesazhet e dërguara nga Uashingtoni në javët e fundit vijnë pasi BE-ja po ndërmerr hapa për të nxitur zhvillimin e industrisë së armëve të Evropës, duke kufizuar potencialisht blerjet e llojeve të caktuara të armëve amerikane. Hapat e hershëm të politikës së jashtme të administratës Trump, duke përfshirë shkurtimin e ndihmës ushtarake për Ukrainën dhe lehtësimin e presionit ndaj Moskës, kanë nervozuar thellësisht aleatët evropianë, duke bërë që shumë njerëz të pyesin nëse Shtetet e Bashkuara janë një partner i besueshëm.
Në mesin e marsit, Komisioni Evropian, organi ekzekutiv i BE-së, propozoi rritjen e shpenzimeve ushtarake dhe bashkimin e burimeve në projektet e përbashkëta të mbrojtjes, ndërsa Evropa shqetësohet për uljen e angazhimit ushtarak të SHBA nën Presidencën e Donald Trump.
Disa nga masat e propozuara mund të nënkuptojnë një rol më të vogël për kompanitë jo të BE-së, duke përfshirë ato me bazë në SHBA dhe Mbretërinë e Bashkuar, thonë ekspertët, citon Reuters.
Në një takim të 25 marsit, Sekretari i Shtetit Marco Rubio u tha ministrave të jashtëm të Lituanisë, Letonisë dhe Estonisë se Shtetet e Bashkuara duan të vazhdojnë të marrin pjesë në prokurimet e mbrojtjes të vendeve të BE-së, thanë burimet Reuters. Sipas dy burimeve për Reuters, Rubio tha se çdo përjashtim i kompanive amerikane nga tenderët evropianë do të shihej negativisht nga Uashingtoni, gjë që këto dy burime e interpretuan si referencë ndaj rregullave të propozuara të BE-së. Një diplomat i Evropës Veriore, i cili nuk ishte pjesë e takimit të Balltikut, tha se atyre gjithashtu u ishte thënë kohët e fundit nga zyrtarët amerikanë se çdo përjashtim nga prokurimet e armëve të BE-së do të shihej si i papërshtatshëm.
