Ish-presidenti i Federatës së Futbollit të Spanjës (RFEF), Angel Maria Villar, insiston se ai nuk do të jetë fajtor nëse Spanja përjashtohet nga Botërori i futbollit “Rusia 2018”.
Në mediumet spanjolle është raportuar se FIFA i ka dërguar një letër paralajmëruese RFEF-së se Spanja mund ta humbasë vendin në Botëror nëse qeveria vazhdon me planet për të zgjedhur një president të ri të federatës, transmeton “Koha Ditore”.
Villar ka dhënë dorëheqjen në verë pas arrestimit të tij me akuzën për korrupsion. “Vetëm qeveria është përgjegjëse nëse Spanja nuk luan në Botëror. Nëse Spanja nuk shkon në Botëror atëherë nuk do të jetë faji im, por unë dua që Spanja të shkojë në Botëror. Unë ende jam president i federatës, e jo Juan Luis Larrea.
Ai po kryen vetëm detyrat administrative në emrin tim. Dorëheqja ime nuk ka zgjidhur asgjë, por unë isha i detyruar të bëja këtë pas arrestimit tim”, ka thënë Villar, përcjellin mediumet spanjolle të hënën. (b.an)
