Pavarësisht reshjeve të dendura të këtyre ditëve të fundit, KESH bën të ditur se hidrocentrali kryesor i kaskadës së Drinit, ai i Fierzës, vazhdon të mbahet i mbyllur, me qëllim grumbullimin e rezervës ujore.
Sipas të dhënave të fundit nga KESH, sasia e reshjeve në këto 10 diët ka përmirësuar ndjeshëm bilancin energjitik të Korporatës, ku niveli në HEC e Fierzës tashmë është rreth 8 metra më lart se niveli më 31 dhjetor.
Sekretariati teknik i komisionit të posaçëm të trajtimit të plotave ka rekomanduar që kuotat në hidrocentralet e Komanit dhe Vaut të Dejës të administrohen me tendencë ulje, ndërsa vlerësoi se Fierza për sa kohë të jetë e mundur të mbahet i stakuar me qëllim akumulimin e prurjeve dhe ritjen e rezervës energjitike.
Të dhënat e fundit bëjnë të ditur se niveli i HEC Fierzë ishte 283.78 m dhe prurjet ishin rreth 500 m3/sek. Niveli në HEC Koman ishte 175.20 m dhe prurjet anësore janë rreth 410 m3/sek dhe niveli në HEC Vau i Dejës ishte 75.79 m dhe prurjet anësore rreth 100 m3/sek.
KESH garanton se situata është plotësisht nën kontroll.
