Policia e Fierit ka arrestuar dy persona të dyshuar si trafikantë droge, të cilëve u ka sekuestruar edhe 121 kilogramë hashash. Top Channel ka njoftuar se arrestimet janë bërë në fshatin Martinë në zonën e Levanit.
Gjatë operacionit “Martina” arrestuan në flagrancë shtetasit Bektash dhe Ervis Isufaj, përkatësisht 57 dhe 27 vjeç, të dy banorë të fshatit.
Policia gjeti dhe sekuestroi gjatë kontrolleve në banesën e dy shtetasve sasinë prej 121 kilogramë hashash të ndarë në 10 thasë.
Dyshohet se lënda narkotike ishte përgatitur për tregun italian, ku do të dërgohej përmes një mjeti lundrues në mënyrë klandestine. Hetimet për identifikimin e personave të tjerë të mundshëm të përfshirë në këtë rrjet trafiku vazhdojnë, ndërkohë që ndaj dy shtetasve Isufaj rëndon akuza e trafikimit ndërkombëtar të lëndëve narkotike e mbetur në tentativë dhe e kryer në bashkëpunim.
