Ndërkohë që procesi i numërimit të votave është drejt fundit, një incident u shënua pas mesnate në KZAZ-në numër 57, të qytetit të Fierit.
Katër persona goditën me mjete të forta në kokë numëruesin e Partisë Socialiste, Roland Bylyshi, 34 vjeç. Konflikti u shënua rreth orës 02:30 të mëngjesit të së mërkurës, ku si pasojë e plagëve të marra numëruesi u dërgua në Spitalin e Fierit.
Sipas Policisë së Fierit, 34-vjeçari Roland Bylyshi u dhunua nga tre vëzhgues, si dhe një kandidat për këshilltar. Kandidati i cili dhunoi numëruesin e PS-së, bëhet me dije se i përket Partisë Lëvizja e Legalitetit (PLL).
Policia është në kërkim të autorëve, ndërkohë që i dëmtuari mori mjekim në spital. Ende mbetet e paqartë se, si autorët mundën të largoheshin nga një ambient i cili është nën ruajtjen e efektivëve.
Ndërkohë që mëngjesin e sotëm kjo KZAZ rezulton e mbyllur, ndërsa procesi i numërimit u ndërpre që pas incidentit. Asnjë numërues nuk është në këtë qendër numërimi, përjashtuar efektivëve të policisë. Nuk dihen arsyet e përleshjes mes agresorëve dhe numëruesit, por dyshohet për shkak të bindjeve politike.
Policia e Fierit shpall në kërkim autorët e dhunës ndaj numëruesit të PS-së
Specialistë të krimeve në Komisariatin e Policisë së Fierit kanë njoftuar menjëherë procedimin penal dhe shpalljen në kërkim të 50-vjeçarit Fatmir Kajolli, banues në lagjen “Mbrostar Ferko” të të njëjtit qytet, ashtu sikurse edhe dy shtetasve të tjerë, Alban dhe Florim Kajolli, respektivisht 22 dhe 23 vjeç, banorë të së njëjtës lagje.
Procedimi penal vjen për pasojë e sulmit të kryer në bashkëpunim me njëri-tjetrin ndaj numëruesit të subjektit politik PS, Roland Bylyshi, 34 vjeç, banor i fshatit Levan të Fierit, sulm që ka ardhur për shkak të detyrës së këtij të fundit.
Materialet hetimore i kanë kaluar Prokurorisë pranë Gjykatës së Shkallës së Parë të Fierit, për veprën penale “shkatërrim i pronës”, “kundërshtim i punonjësit të Policisë së Rendit Publik” dhe “kanosje apo dhunim ndaj pjesëmarrësve në zgjedhje, e kryer në bashkëpunim”, të gjitha të parashikuara nga Kodi Penal.
