UPDATE/ I pranishëm në festimet për Ditën e Verës tek Sheshi Nënë Tereza ka qenë edhe kryetari i Bashkisë së kryeqytetit Erion Veliaj, i cili ka përshëndetur dhe uruar të gjithë qytetarët për festën. Kryebashkiaku ka qenë i veshur me një bluzë me që mbante stemën e Superman-it, zgjedhje të cilën ai e ka komentuar duke thënë se ishte e vetmja që kishte për të treguar një anë më fëminore dhe që shkonte për shtat me festën.
“Ajo që ndodhi sot në sheshin Nënë Tereza, është në miniaturë ajo që ndodh në qytet. E di që ky qytet ka një milion halle e një milion banorë… dua të falenderoj 50 mijë herë të gjithë qytetarët që dolën për pastrimin e qytetit, për ta mbajtur pastër. Sot në fakt e kemi orientuar të gjithë ditën tek fëmijët… dhe nga të gjitha kostumet e mërzitshme, këtë bluzë kisha me imazhe më fëminore.”- tha Veliaj.
Më tutje kreu i Bashkisë deklaroi se së shpejti do të nisin konsultimet publike për nisjen e punimeve tek sheshi Skëndërbej, bisedime të cilat do të zgjasin për rreth dy muaj, për ti hapur më pas rrugën punimeve në shesh.
…………………….
Këtë të hënë në vend do të festohet Dita e Verës, teksa në kryeqytet janë përgatitur një sërë aktivitetesh për të argëtuar qytetarët. Festimet kryesore pritet të zhvillohen në Bulevardin Dëshmorët e Kombit, i cili është bllokuar dhe kthyer në një pedonale të madhe.
Pavarësisht se moti është i vranët dhe duket sikur do të ketë reshje, që në mëngjes është shënuar një shtim i njerëzve në bulevardin kryesor të kryeqytetit.
Ndërkohë edhe pemët, përgjatë bulevardit, janë veshur me ngjyra të shumta
, ndërsa në sheshin “Nënë Tereza”, bashkia po përgatitet për koncertin që do të mbahet në orën 10.30.
Ansambli i Tiranës, Teatri i Kukullave, Cirku i Tiranës gjithashtu janë pjesë e festimeve të 14 marsit, ku kanë parashikuar performanca të ndryshme argëtuese për fëmijë dhe të rritur.
Festivali i balonave, aktivitete sportive, performanca artistike, panair i ushqimeve bio dhe koncerte surprizë, janë aktivitetet që do të mbahen në “Ditën e Verës.
