Në Angli, The Sun është e sigurt, Gareth Southgate do t’i heqë shiritin e kapitenit Wayne Rooney-it. Çështja vazhdon të diskutohet paçka se po bën rreth një javë që kur 31-vjecari u pikas me disa foto teksa festonte si i çmendur fitoren ndaj Skocisë. Alkool dhe festa deri në orën 5 të mëngjesit, janë akuzat që e kanë shoqëruar Rooney-in përgjatë gjithë javës. The Sun zbulon më tej se, gjatë mbrëmjes, 31-vjecarit i është komunikuar nga stafi i përfaqësueses, se duhej të largoheshin për të qenë të gatshëm në stërvitjen e së dielës, por ai ka vazhduar të festojë. Pikërisht për këtë pretendim Rooney pritet të penalizohet nga trajneri Southgate, i cili duhet thënë se është vënë tejet në presion nga shtypi britanik. Nga ana tjetër, gjërat nuk shkojnë mirë as në klubin e Wayne Rooney-it, Manchester United-it. Në prag me sfidën me Arsenalin, në twitterin zyrtar u publikuan “highlights”-et e fitores së magjishme 8-2 të arritur 5 vite më parë, kur skuadrën e drejtonte Alex Ferguson. Në atë ndeshje Wayne Rooney shënonte një tripletë. Por i vrullshëm ka qenë reagimi i tifozëve. Shumëkush kërkoi që postimi të fshihej, pasi skuadra aktuale s’kishte aspak lidhje me atë të Ferguson dhe aq më tepër kapiteni Rooney. Kështu stafeta e presionit i ka kaluar Jose Mourinhos. Cështja e kapitenit dhe ripërballja me Arsene Wenger janë problemi radhës për të. / Tring sport
