Nga Ardit Rada
Ndërsa 7 Marsi vijon të jetë një ditë e shënuar për mësuesit, më tepër të shqetësuar për këto “festime” mbeten prindërit dhe nxënësit. Detyrimi për t’u bërë dhuratë mësuesve shoqërohet ende me frikën se a po u jep gjënë e duhur për të cilën kanë nevojë. Si çdo vit, denoncimet në rrjete sociale kanë ilustruar me shembuj konkretë panikun e nxënësve më 7 Mars dhe shqetësimin e prindërve.
Lulet sa vinë e bëhen të papërfillëshme në listën e dhuratave ndërkohë që në jo pak raste kërkesat e mësuesve për fëmijët kanë qenë konkrete. Institucionet arsimore që presupozohet të jenë baza e nxënies së dijes vijojnë të mbeten një problem shqetësues. Sikur të mos mjaftonin rastet e dhunës ndaj të miturve që denoncohen dita-ditës në kopshtet dhe shkollat private apo publike, një dite e vetme në vit hedh poshtë të gjithë rolin e punonjësit në arsim.
Në pamundësi për t’i kontrolluar rastet në fjalë, sigurisht që edhe parandalimi bëhet i vështirë. Frika për ta denoncuar mësuesin mitmarrës shtohet dita ditës ndërsa mesatarja e notave ka marrë një rol tashmë për vijimin e studimeve. I gjithë shqetësimi nis që në arsimin 9-vjeçar dhe deri në përfundim të shkollës së mesme, kryesisht nga mësuesit e rinj që kanë guximin të kërkojnë sende me vlerë duke nisur nga bizhuteritë e deri tek aparatët celularë.
E gjitha kjo situatë e krijuar dhe që vë në siklet prindër e nxënës bashkë të një vendi të varfër nxitet sepse pavarësisht denoncimeve nuk është marrë asnjë ndëshkim penal apo administrativ. Dhurata ndaj mësueseve ngjan më tepër si një gjobëvënie apo akt korruptiv i ndërsjelltë, sepse askush nuk e mohon dot që dhurata më e mirë përkthehet në notë më të lartë e njëkohësisht të pamerituar.
George Bernard Shaw shkruante dikur: “Në moshë të njomë e ndërpreva edukimin tim pasi m’u desh të shkoja në shkollë…”
Një marrëdhënie mësues nxënës që prishet ditën e Shkollës së Parë Shqipe tregon jo vetëm sa larg jemi nga sakrifica e vitit 1887, por edhe edukimin e gabuar për brezin e ri që nesër presupozohet të jetojë në një Shqipëri pa korrupsion. /JavaNews
