Menaxheri legjendar i Manchester Unitedit, Sir Alex Ferguson ka paralajmëruar Pep Guardiolën se menaxhimi në Premier Ligë nuk do të jetë i lehtë për të, por është shprehur i bindur se trajneri i tanishëm i Bayern Munichut do të ketë sukses në Angli.
Guardiola do ta zëvendësojë Manuel Pellegrinin në postin e menaxherit te Manchester City dhe kjo do të jetë puna e tij e parë në futbollin anglez.
Spanjolli njihet për cilësitë e tij të mira si menaxher dhe Fergusoni derisa ka lavdëruar kualitetet e tij, ka thënë se Guardiola do ta ketë të vështirë që ta marrë futbollin anglez si “pata në ujë”.
“Manchester City ka bërë një punë të mirë me emërimin e tij, por Pepi nuk do ta ketë të lehtë. Futbolli anglez nuk është i lehtë”, ka thënë Fergusoni për Sky Sports.
“Çdo trajner i huaj që ka ardhur këtu do t’ua thotë të njëjtën gjë. Arsene Wenger fliste për të njëjtën gjë pak muaj pas emërimit, madje edhe Jose Mourinho ka folur për këtë punë”, ka shtuar Sir Alex. “Pep do të ketë sukses, por nuk mendoj se do ta ketë mundësinë ta përsërisë atë që bëri me Barcelonën sepse ata ishin të një standardi të lartë, ata ishin më të mirët”.
