Aksidenti tragjik i disa ditëve më parë, ku një 7-vjeçar humbi jetën si pasojë e përplasjes nga dy automjete, riktheu në vëmendje vështirësitë dhe rreziqet që u kanosen fëmijëve të cilët punojnë në rrugë.
“Janë të rrezikuar për tu abuzuar, fizikisht, psikologjikisht e seksualisht. Për tu abuzuar edhe nga pikëpamja që kryejnë punë. Kujdesi social për fëmijët, kkujdesi për fëmijët nuk është kurrë i tepërt dhe duhet të jetë i domosdoshëm. Zgjerimi i kujdesit për ta është nnjë diagram kompleks që përfshin shumë faktorë, por mendoj që faktor kryesor ngelet familja.
Duhet të forcojmë legjislacionin për përgjegjësinë që ka familja për këta fëmijë që i lë në rrugë”, tha sociologu Gëzim Tushi.
Në bashkitë e vendit, ndërkohë, prej kohësh funksionojnë grupe që monitorojnë situatën në terren dhe identifikojnë rreziqet me të cilat përballen këta fëmijë.
“Në territorin e Bashkisë Tiranë është ngritur një strukturë e posaçme që punon tashmë prej pesë vitesh. Roli i saj është të identifikojë çdo fëmijë në rrezik apo situatë rruge dhe të bëjë vlerësimin e shpejtë të rrezikut në të cilin ndodhet fëmija. Më pas, në bazë të këtij vlerësimi, aktivizohet sistemi mbrojtës i fëmijëve dhe ata shoqërohen drejt shërbimeve përkatëse sipas vlerësimit në terren”, tha Aida Pambuku, drejtore e Skuadrave në Terren
Skuadrat veprojnë në shumicën e rasteve në “pika të nxehta”, aty ku është identifikuar numri më i lartë i fëmijëve në rrugë, si zona e Bllokut apo qendra e kryeqytetit.
“Misioni ynë është që fëmija dhe familja të referohen në sistemin e shërbimeve sociale që të marrin shërbimet për fuqizimin e tyre. Të referohen pranë qendrave sociale të bashkisë, struktura për mbrojtjen e fëmijëve, të rregjistrohen prindërit në punë. Në rastet kur fëmijët janë të pashoqëruar dhe skudra e terrenit dyshon që ndaj fëmijës po kryehet një vepër penale, kuadri ligjor cdo strukturë e ngarkon me përgjësinë që të raportojë drejt strukturave të policisë së shtetit”, shtoi Pambuku.
Sipas të dhënave nga Bashkia Tiranë, viti 2025 u mbyll me rreth 150 raste të identifikuara dhe të referuara drejt shërbimeve, ndërsa vetëm në Janar të vitit 2026 janë identifikuar 39 fëmijë në situatë rruge.
