Duke filluar nga ky muaj fatura e energjisë elektriket do të shkojë në çdo banesë apo njësi ekonomike.
Edhe pse ky shërbim është një detyrim, shumë abonentë ankohen se nuk e marrin. Administratori I OSHEE grup, Enea Karakaci, në një intervistë për Vizion Plus thotë se kompania e shpërndarjes së energjisë ka një marrëveshje të re.
I gjithë zinxhiri i faturës, që nga pritimi, zarfimi dhe shpërndarja do të jetë kompetencë e Postës Shqiptare.
Ne kemi gjithsej 1milion e 300 mijë abonentë. Çdo muaj do printohen po kaq fatura, do zarfohen si dhe do të shpërndahen nga posta shqiptare, si agjenti i vetëm që ka detyrë të ofrojë këtë shërbim. Ne e dimë që ka zona që kanë infrastrukturë të vështirë, po nuk do të ketë tolerim për zonat urbane. Madje ftojmë qytetarët që ankohen në zyrat tona në rast se nuk e marrin këtë shërbim, për të cilin OSHEE paguan. Ne do të kemi një vend të dedikuar në faqe për tu ankuar nga abonentët për këtë shërbim, – u shpreh Karakaçi
Pas kalimit të shërbimeve online edhe fatura e energjisë elektrike gjendet edhe në llogarinë e E-Albania. Por pagesa e saj për shumë familje kryhet nga kryefamiljarët, kryesisht pensionistët.
Duke qenë se tashmë kemi vetëm një agjent që merret me të gjithë procesin e faturës, ne do ta kemi më të lehtë monitorimit dhe verifikimin e problemit. Ndaj për të përmirësuar këtë shërbim kemi një marrëveshje të re me postën, – sqaroi Karakaçi.
Një nga shkaqet e mosshpërndarjes së faturës në banesa është mungesa e saktë e adresës, por së fundi ato nuk po shpërndahen as në zonat urbane apo edhe në qendër të kryeqytetit./f.s
