Instituti i Monumenteve të Kulturës ka reaguar pas publikimit të fotove se fasada e stadiumit Qemal Stafa është shkatërruar, përkundër premtimit se ajo nuk do të prekej dhe do të qëndronte si pjesë integrale e stadiumit të ri Arena Kombëtare. IMK shprehet përmes një deklarate se se të gjithë elementët e gurtë të kohës po inventarizohen dhe do të rivendosen në vendin e tyre pas çmontimit dhe restaurimit të plotë sipas fazave të restaurimit. 
Deklarata
Nuk ka asnjë ndryshim të Projektit për riaftësimin dhe integrimin e fasadës historike ekzistuese te Stadiumit “Qemal Stafa”, duke respektuar pikë për pikë projektin origjinal të Gherardo Bosio-s, miratuar në mbledhjen e Këshillit Kombëtar të Restaurimeve në datën 2 korrik 2016.
-E vërteta është që fasada monument kulture po trajtohet me të gjitha standardet profesionale nën mbikëqyrjen e Institutit të Monumenteve të Kulturës në bashkëpunim me qendrën italiane të ekselencës në restaurim Palazzo Spinelli.
– Nuk është prishur asnjë element prej guri i fasadës. Puna po kryhet në përputhje të plotë me projektin e miratuar, në bashkëpunim të plotë me specialistët e IMK, duke ecur me fazat e Çmontimit, Magazinimit, Konsolidimit dhe Restaurimit.
-Të gjithë elementët e gurtë të kohës po inventarizohen dhe do të rivendosen në vendin e tyre pas çmontimit dhe restaurimit të plotë sipas fazave të restaurimit.
-Fasada do të vazhdojë të ekzistojë sipas miratimit dhe aprovimit në KKR, si një vlerë e trashëgimisë sonë kulturore, jo vetëm si pjesë muzeale, por edhe si funksion, jo vetëm si element i integruar në brendësi, por si pasaportë hyrëse duke e ftuar njësoj si dikur publikun në stadium, në stadiumin e tij.
Instituti i Monumenteve të Kulturës garanton mbrojtjen dhe ruajtjen e këtij monumenti të trashëgimisë kulturore në këtë projekt të rëndësishëm dhe unikal të riaftësimit dhe integrimit të fasadës historike ekzistuese te Stadiumit “Qemal Stafa”./java/a.k
