Përtej shumave financiare të derdhura nga buxheti i shtetit në llogaritë e tyre bankare, të afërmit duan vendosjen e drejtësisë së munguar.
Për xhaxhain e Aleks Nikës, Mark Nikaj, i cili është edhe pëfaqësues i familjes në proceset gjyqësore, dëmshpërblimi nga qeveria nuk ka ndonjë domethënie.
Ai e konsideron si një lëvizje të zakonshme ligjore duke vendosur theksin tek drejtësia.
“Dhënia e parave për ne është thjesht një procedure ligjore që quhej kryer dhe u krye.
Kjo erdhi për shkak të vendimit që dha gjykata Administrative për dëmshpërblim kur e quajti krim shtetëror.
Ne duam drejtësi, veç kësaj asgjë nuk na hyn në sy.
As e falim dhe as e harrojmë këtë ngjarje që na mori të dashurit e zemrës.
Kemi gjashtë vite që vajtojmë. Përgjegjësit një ditë do vendosen para drejtësisë”, u shpreh Nikaj.
Qeveria shqiptare vendosi ditën e djeshme shlyerjen e detyrimeve ligjore ndaj viktimave të 21 janarit 2011, duke miratuar fondin me vlerë prej 160 milionë lekësh. Kjo shumë parash do të ndahet si dëmshpërblim për familjarët e viktimave.
Vetëm disa ditë më parë (11 janar 2017), të afërmit dhanë një intervistë për gazetën “TemA”, ku u shprehën se nuk u ka ngelur shumë shpresë tek zbardhja e çështjes.
Gruaja e të ndjerit Ziver Veizi, e lodhur nga labirinti ku ndodhet çështja është shprehet besim plotë veç tek organet ndërkombëtare. “Shpresa vdes e fundit; është një shprehje që më shoqëron prej vitesh. Tek ne ka vdekur edhe ka lindur prapë. Gjykoj se një ditë e vërteta do të trimfojë.” – ka thënë Alma Veizi, teksa e ka pasur të vështirë të rrëfejë për kujtimet që i kanë ngelur nga ngjarja e hidhur.
Ndërkohë edhe në familjien “Myrtaj”, fatkeqësia që u ka ndodhur nuk është përtypur ende. Renato Myrtaj, i biri i Faik Myrtajt, është shprehur se përpos hallit që i ka rënë, në adresë të tyre vazhdojnë të venë kërcënime të forta.
“Kjo është një drejtësi e mohuar dhe 2 emrat e përgjegjësve tashmë i njohin të gjithë shqiptarët. Edhe nëse do të guxojë ndokush ta hetojë, nuk ka për t’ia dalë kurrë. Gjurmët që kanë lënë duart e lara me gjak, janë fshehur mirë. Shpresa e fundit ka ngelur në duart e Strasburgut!”, ka nenvizuar më herët Renato Myrtaj.
Plaga qëndron ende e hapur edhe në familjen e Hekuran Dedës, ku familjarët shprehen se besojnë tek premtimi i kryeministrit Edi Rama për zgjidhjen e çështjes.
“Këto 6 vite kanë qenë shekuj për shkak tëvështirësive që kemi pasur. Kemi folur boll. Nuk gjej shumë fjalë pasi gjithçka ka shterur. Kam besim se kryeministri do ta mbajë fjalën dhe do të vendosë pas hekurave përgjegjësit”, ka treguar Zabit Deda, vëllai i Hekuranit që mbeti i vrarë me plumb në kokë afër portës së kryeministrisë.
