Në kazermën “Adem Jashari”, në Prishtinë zyrtarisht ka nisur manifestimi Epopeja e UÇK-së.
Fillimisht, presidenti Hashim Thaçi si komandanti suprem i FSK-së dhe komandanti i kësaj force, Rrahman Rama kanë kaluar në revistë kuadrot e FSK-së, raporton KTV.
Presidenti Hashim Thaçi ka thënë se epopeja e UÇK-së është ngjarja më heroike e qëndresës së popullit tonë për liri tash e 18 vjet.
Para trupave të Forcës, presidenti edhe një herë tjetër është zotuar se FSK-ja do të transferohet në ushtri.
Ai ka paralajmëruar se në ditët në vijim do të marrë nismën për ndryshimin e Ligjit për FSK-në, që do të mundësojë shndërrimin e FSK-së në Forca të Armatosura, pa prekur ndryshimet kushtetuese. Thaçi ka thënë se Kushtetuta e Kosovës nuk paraqet kurrfarë pengese për këtë.
Thaçi ka thënë se shtetet fqinje, të cilat kanë ushtrinë e tyre duhet ta kuptojnë transformimin e FSK-së. Ndërsa, kryeministri Isa Mustafa, ka thënë se çdoherë do të kujtohet sakrifica heroike e familjes Jashari. Sipas tij, 5 marsi është dita kur e mira fiton ndaj së keqes dhe e vërteta ndaj trillimit. Por përfaqësues të familjes Jashari, ata nuk morën pjesë në këtë ceremoni.
Manifestimi “Epopeja e UÇK-së” do të vazhdojë edhe më 6 dhe 7 mars. “Epopeja e UÇK-së” tradicionalisht shënohet çdo vit për ta nderuar luftën heroiket të komandantit legjendar Adem Jashari, sakrificën e familjes Jashari dhe nderimin e gjithë dëshmorëve dhe të të rënëve për liri.
19 vjet më parë në Prekaz të Skënderajt forca të mëdha policisë dhe ushtrisë serbe kishin marrë një ofensivë duke sulmuar me artileri të rëndë familjen Jashari.
Komandanti Adem Jashari bashkë me babanë Shabanin dhe vëllanë, Hamzën, të ndihmuar edhe nga anëtarë të tjerë të familjes kishin rezistuar deri në flijim.
Në këtë betejë të përgjakshme ranë për liri 55 persona, 22 prej të cilëve ishin familjarë të ngushtë të komandantit Adem Jasharit.
Këtij sulmi i mbijetoi vetëm Bashkimi, djali i Rifatit, i cili ia del që mes datave 5-6 mars të largohet si dhe Besarta, vajza e Hamzës, e cila pa dhe përjetoi tmerrin derisa vriteshin anëtarët e familjes së saj, përgatiti Koha. (b.an)
