Një 44-vjeçare që ushtronte detyrën e noteres në qytetin e Shkodrës ka përfunduar në prangat e Policisë, pasi dyshohet për shpërdorim detyre. Policia bën me dije se noterja Majlinda Dibra, banuese në lagjen “Qemal Stafa”, është ndaluar pasi Gjykata kishte pranuar kërkesën e Prokurorisë Shkodër për lëshimin e udhër-arrestit ndaj saj.
Gjykata vendosi masën e sigurisë “arrest me burg” për Dibrën, ndërsa Policia bëri arrestimin e saj. 44-vjeçarja e akuzuar për shpërdorim detyre dyshohet se ka kryer falsifikim dokumentesh. Bëhet fjalë për një çështje pronësie, ku sipas organit të akuzës, noterja Majlinda Dibra ka bërë falsifikim dokumentesh.
Sipas burimeve, bëhet fjalë për një pronë të trashëguar, ku pronari i saj është ndarë nga jeta. Ky i fundit është paraqitur te noterja Majlinda Dibra, duke i lënë me testament shtëpinë djalit të tij si trashëgimi.
Personi që ka lënë këtë testament, ka qenë i martuar dhe ish-bashkëshortja e tij pretendon që të marrë gjysmën e shtëpisë. Sipas bashkëshortes, noterja Dibra ka falsifikuar firmën e burrit në testament, sipas të cilit shtëpia në fjalë i ka kaluar djalit. Pretendon se është falsifikuar me idenë se bashkëshorti i saj në datën kur është lëshuar testamenti, nuk ka qenë në gjendje shëndetësore të përshtatshme për të shkuar te noterja.
Gjithë këto pretendime noterja e arrestuar i ka hedhur poshtë, duke thënë se personi që ka lënë testamentin ka paraqitur edhe raportin mjekësor se është në gjendje të përshtatshme shëndetësore për të kryer këto veprime. Është bërë një akt-ekspertimi nga Prokuroria për firmën e personit në fjalë dhe sipas organit të akuzës, deri më tani rezulton e falsifikuar.
Noterja ka hedhur poshtë akuzat, duke thënë se testamentin e ka lënë me vetëdije dhe vullnet të plotë dhe se nuk ka bërë asnjë falsifikim. Tashmë pritet që të bëhet një tjetër akt-ekspertim, që do ta kërkojë pala mbrojtëse e noteres për të nxjerrë të vërtetën në këtë histori. Edhe më përpara, në Shkodër ka pasur noterë të arrestuar, por deri më tani askush prej tyre nuk është dënuar, pavarësisht akuzave fillestare./Panorama/a.m.
