Radamel Falcao pret të kalojë sezonin e ardhshëm në Monaco pas dy edicioneve të vështira në Premierligë.
Sulmuesi iu bashkua Manchester Unitedit në formë të huazimit në shtator të vitit 2014, ku arriti të realizojë vetëm katër gola në 29 paraqitje, derisa vuajti të ruajë formën e mirë fizike tek skuadra e menaxherit Louis van Gaal.
Por, karriera e tij ngeci edhe më shumë në Chelsea gjatë këtij sezoni ku 30-vjeçari luajti vetëm një herë në Premierligë nga tetori, për shkak të dëmtimeve dhe kjo ka bërë që ai të mbetet jashtë ekipit të Kolumbisë për “Copa America”.
Ai pret të kthehet në Monaco, klub që pagoi 60 milionë euro për transferimin e tij nga Atletico Madrid më 2013.
“Monaco ka bërë një investim të madh për mua dhe ata dëshirojnë që të kthehem. Në parim, ideja është që të jem në Monaco për sezonin e ardhshëm”, deklaroi Falcao për “Tyc Sports”. (b.an)
