Nga Flogert Muça
Kuvendi i Shqipërisë do të mblidhet në një seancë të jashtëzakonshme plenare pasditen e së martës, më 11 prill, për të diskutuar dhe miratuar komisionet e Vettingut. Avokati i Popullit dorëzoi në Kuvend listat dhe dosjet e aplikantëve pas verifikimit nga Operacioni Ndërkombëtar i Monitorimit.
Përmes një shkrese zyrtare, kreu i kuvendit Ilir Meta ka firmosur mbajtjen e seancës së jashtëzakonshme plenare ditën e martë, në orën 16:00.
Mirëpo, pas kësaj shkrese ka reaguar edhe kreu i demokratëve, Lulzim Basha, i cili ka deklaruar prerazi se nuk do të shkojnë për të votuar komisionet e Vettingut. Një qëndrim ky që është më domethënës se kurrë sot, kur kemi një krizë politike të cilën PD-ja e mban peng. Qëndrimi në çadër dhe mospërgjigja e ndaj ftesës së kryemninistrit Rama për të dialoguar, është poashtu domethënëse se në fakt, halli nuk janë vetëm zgjedhjet që me shumë gjasë do jenë një tsunam për PD-në, por është Vettingu. I cili ka qenë shkaku kryesor i ngritjes së çadrës dhe bojkotit të Kuvendit, si plani ”ZH” për ta sabotuar atë përfundimisht pas disa tratativave me ”Venecian” e ‘Kushtetuesen” që dështuan me sukses.
Këtë e konfirmoi Basha pardje me gojën e tij teksa tha se nuk do votojë vetting-un siç e do Edi Rama. Dhe pse e di i madh e i vogël se ky nuk është një projekt i Edi Ramës, por i mbështetur pa kushte nga ai për reformimin e drejtësisë. E di i madh e i vogël se reforma në drejtësi është një projekt ekspertësh të huaj dhe vendas, që ka marrë ‘OK’ nga Komisioni i Venecias e partnerët ndërkombëtarët dhe që është sot, kushti i vetëm për çeljen e negociatave me BE-në. Megjithatë, Basha nga çadra e vetmisë së madhe i tha ‘JO’ edhe pardje, duke sulmuar ndërkombëtarët si të blerë dhe duke treguar edhe njëherë përpara opinionit publik gjendjen e rënduar në të cilën ndodhet ai vetë por edhe PD-ja e tij.
Fajin pra e ka Vettingu. Është ai ligj që po e lë PD-në jashtë zgjedhjeve të 18 qershorit, me shpresën se Rama do hajë presonin e do thyejë fjalën e dhënë ndaj partnerëve ndërkombëtarë dhe shqiptarëve, ku tha se ”Çdo projekt reformë që merr ”OK” nga ndërkombëtarët, ka votën e PS-së”. E nëse Rama e thyen këtë fjalë të dhënë, jo vetëm që ai do jetë humbës, por ndërkombëtarët dhe shqiptarët më mirë të ikin të gjithë nga ky vend dhe të lenë çadrën si ‘padrone’ të Shqipërisë.
Vettingu dhe asgjë tjetër ëshët sot halli i madh i Bashës. I cili duke u kapur pas zgjedhjeve të lira, qeverive eksperimentale e të tjera histori qesharake si këto, në fakt po kërkon që të marrë ”OK” që Vettingu të mos kalojë siç duhet dhe të votohet një ligj tjetër fasadë. Pra, i vetmi që po bën propagandë për të bërë ligje fasadë sot është Basha, i cili ka një hall sa një mal përpara dhe për ta zgjidhur po çon edhe Partinë Demokratike në humnerë. Bashën dhe PD-në i “vret” vettingu korrekt dhe vetëm një pisllek politik për ta kthyer këtë ligj në fasadë i shpëton ata. Ndaj dhe sot bëjnë presionin me bojkot, duke lënë të kuptohet vazhdimisht se kërkojnë thjeshtë dhe vetëm siguri.
E marta do jetë dita kur Basha do dalë dhe do të ulërasë se Rama po kap drejtësinë, duke u dridhur në fakt nga mostërheqja që kryeministri po bën duke bërë asnjë hap pas nga fjala që i ka dhënë qytetarëve për të votuar ligjin e Vettingut, i cili është i gjithëpranuar nga Komisioni i Venecias, partnerët ndërkombëtarë dhe Gjykata Kushtetuese.
Të gjitha alibitë e Bashës dhe kushtet që ndryshohen nga ai ditë për ditë, janë stërkëmbësha që të çojnë në një pikë, te vettingu. Ai është fajtori i gjendjes së PD-së sot. E midis atij dhe PD-së, politika këtë herë duket të mendojë për shqiptarët dhe jo për veten, duke votuar për drejtësinë e vërtetë.
