Një britanik u dënua me burg nga një gjykatë pas zbulimit të një fabrike kanabisi në një godinë që dikur kishte shërbyer si kishë. Nuk u provua kurrë që Steven Morgan kishte shkelur në kishën e vjetër që ndodhej në Armitage, por gjykata e gjeti fajtor pasi dëgjoi se ai kishte qenë në dijeni të aktivitetit kriminal dhe kishte ndërmarrë veprime aktive që ky aktivitet të mos zbulohej. Morgan, 56-vjeç u kap nga kamerat e sigurisë teksa blinte aromatizues, që në gjykatën e Stafford u tha se i donte për të mbuluar erën e kanabisit. Pak kohë më pas në ambientet e kishës u zbulua edhe një faturë e këtyre blerjeve.
Morgan u dënua për një periudhë më të gjatë se personi që kujdesej për fabrikën, që ishte një shqiptar. Më 24 Korrik, kur policia hyri në kishë pasi kishte marrë ankesa për erën që vinte nga kjo godinë, gjeti brenda H.Malajn. Ky i fundit u dënua me 14 muaj burg.
Në gjykatë hetuesit thanë se Morgan ia kishte lënë ambientin me qira palëve të tretë, kundrejt tarifës prej 1 mijë paundëve për shkak se ishte në borxhe të mëdha. Ai e kishte marrë vetë me qira si magazinë për gjysmë çmimi.
Kur zbuloi se po përdorej për fabrikë kanabisi, mbylli njërin sy dhe u përpoq ta fshihte zbulimin e saj duke blerë aromatizues… Përveç kësaj, në gjykatë u zbulua se mes Morgan dhe shqiptarit Malaj, që u përshkrua si “kopshtari” i kësaj u fabrike, kishte pasur më shumë se 40 telefonata.
I gjithë ambienti ishte përshtatur në mënyrë të sofistikuar për të kultivuar drogën. Vlera e bimëve të kanabisit që u gjetën në këtë kishë kapte vlerën e rreth 214 mijë paundëve.
Avokati i britanikut pranoi problemet financiare të 56-vjeçarit dhe faktin se kishte mbyllur njërin sy, kur kishte kuptuar aktivitetin që po lulëzonte brenda kishës, por tha se klienti i tij nuk kishte lidhje me këtë aktivitetet.
“Nuk ka prova se ai ka shkelur brenda në kishë. Nuk bëri asnjë tentativë të sofistikuar për të mbuluar çfarë po ndodhte. Pa një mundësi për të bërë para dhe e shfrytëzoi”, tha avokati mes të tjerash.
Në përfundim, gjykata e dënoi Morgan me 27 muaj burg.
/a.r
