Ministri i Mbrojtjes, Niko Peleshi njofton se forca dhe mjete nga Forcat e Armatosura janë dislokuar në Kukës dhe ndodhen në gatishmëri për të mbështetur banorët e disa prej komunave në Kosovë, të cilat janë prekur nga përmbytjet si pasojë e reshjeve të dendura ditët e fundit.
“Forca dhe mjete nga FA janë dislokuar në Kukës, në gatishmëri për të mbështetur banorët e disa prej komunave në Kosovë, të cilat janë prekur nga përmbytjet si pasojë e reshjeve të dendura ditët e fundit. Të gatshëm të ndërhyjmë në koordinim me autoritetet e Kosovës, në rast të përkeqësimit të situatës. Me vëllezërit tanë në ditë të mira dhe të vështira”, shkruan Peleshi në një postim në rrjetet sociale.
Shumë zona janë përmbytur pas reshjeve të shumta në dy ditët e fundit në Kosovë. Skënderaj dhe Mitrovica janë dy komunat më të prekura dhe kanë shpallur gjendje të jashtëzakonshme. Situatë e ngjashme është edhe në Klinë dhe Istog./m.j
