Nico Rosberg nuk ndalet më dhe tashmë titulli i parë Botëror në Formula 1 është shumë pranë për gjermanin. Rosberg dominoi Cmimin e Madh të Japonisë duke përfituar nga një tjetër start i tmerrshëm i garës nga ana e rivalit të tij më të madh Lewis Hamilton. Anglezi pas gabimit fillestar arriti të rikuperonte, shumë pozicione duke e përfunduar garën në vendin e tretë por tanimë e sheh veten 33 pikë pas Rosberg në klasfikimin e përgjitshëm kur mbeten edhe 4 gara deri në fund të sezonit.
Në fund kishte festë për Mercedesin që fitoi matematikisht titullin kampion për konstruktorë, i treti rradhazi për skuadrën gjermane. Vendi i dytë në Suzuka shkoi për Max Verstappen i cili me Red Bullin e tij zhvilloi një tjetër garë pozitive, ndërsa zhgënjeu edhe njëherë tjetër Ferrari. Sebastian Vettel edhe pse bëri një garë të mirë për pjesën më të madhe të xhirove duke iu afruar podiumit në fund Ferrari gaboi strategjinë me gjermanin që e mbylli garën në vendin e 4-t. I 5-ti në Suzuka u rendit Kimi Raikkonen i ndjekur nga Daniel Ricciardo.
Për t’u kthyer te dy kryesuesit e klasifikimit të përgjithshëm, Rosberg i nisur nga pole-position falë suksesit në Suzuka vuri njërën dorë te titulli. Hamilton nga ana tjetër vuajti pasojat e një një starti shumë të keq me kampionin në fuqi të Botës që humbi 7 pozicione në vetëm një kthesë. Më falni djema ishte komenti i Hamilton në përfundim të garës por divergjencat mes tij dhe drejtuesve të Mercedes do të vazhdojnë edhe pas garës së Japonisë. Për ta kuptuar dicka të tillë mjafton të dëgjosh deklaratat e Niki Laudas presidentit jo ekzekutiv të Mercedesit në përfundim të garës i cili u shpreh se Leëis e ka të pamundur ta fitojë këtë kampionat dhe se titulli kampion do ti përkasë Nico Rosberg-ut. Gjermanit 4 gara përpara fundit të sezonit nuk i mbetet gjë tjetër vecse të menaxhojë avantazhin prej 33 pikësh që ka ndaj britanikut në klasfikimin e përgjithshëm.
