Këngëtarja shqiptare Elhaida Dani ka shkëlqyer mbrëmjen e djeshme në natën e parë gjysmëfinale të Eurovizion. Dhe ky nuk është një koment që vjen nga shqiptarët por nga vetë Eurovizion.
“Një zë fantastik, shqiptarët duhet të jenë krenarë me Elhaida Danin”. është ky komenti në faqen zyrtare të Eurovizion në Twitter menjëherë pas performancës së Elhaida Danit.
Zëri brilant i këngëtares shkodrane ka mahnitur jo vetëm spektatorët e pranishëm në skenën madhështore të Vjenës por edhe shikuesit anembanë botës. Kjo ka bërë që një numër i pafundëm komentesh pozitive të vërshojnë në drejtim të Danit dhe performancës së saj.
Një nga këto komente ka ardhur edhe nga rrjeti ndërkombëtar informativ BBC. Përmes një postimi BBC ka komentuar në faqen e Facebookut veshjen e Elhaidës, duke iu referuar incidentit të Madonës.
“Sa mirë të shohësh një këngëtare femër teksa këndon pa frikën se mund t’i bie pelerina”, shkruan BBC Eurovision pas debutimit të Elhaidës me këngën “I’m Alive”.
