Në mbyllje të eksperiencës së lavdishme europiane, skuadra e Skënderbeut, e cila arriti të marrë një fitore historike në këtë fazë të grupeve të UEFA Europa League përballë Sporting Lisbona, tashmë kërkon të bëjë një mbyllje spektakolare, teksa nesër në “Elbasan Arena” synon rezultatin pozitiv ndaj Lokomotiv Moskva. Të paktën këtë objektiv shprehu në deklaratën për shtyp trajneri i Skënderbeut, Mirel Josa.
“Skënderbeu është i motivuar për të fituar ndeshjen, pavarësisht koefiçientit të vështirësisë së ndeshjes apo fortësisë së Lokomotiv Moskva. Së pari, duke fituar apo marrë një barazim, ne rrisim koefiçientin e pikëve për klubin sa i takon sezonit të ardhshëm. Së dyti, klubi me një rezultat pozitiv përfiton edhe nga ana ekonomike, natyrisht edhe futbollistët. Së treti, luajmë përballë tifozëve tanë dhe duam t’i kënaqim ata me lojën tonë, por edhe me rezultat. Shto dhe faktin që rezultati pozitiv na karikon për ndeshjet e fundit në kampionat për këtë vit, ku do të tentojmë të marrim kreun”, ka deklaruar trajneri Josa argumentet sipas të cilave korçarët do të synojnë rezultatin pozitiv.
Kreu i pankinës së Skënderbeut deklaron se Kampionët e Shqipërisë mund të kishin marrë një rezultat pozitiv edhe në transfertën e zhvilluar në Moskë.“Janë shumë arsyet pse Skënderbeu e kërkon rezultatin pozitiv, fundja në një ndeshje futbolli luhet për të fituar. E përsëris, Lokomotiv Moskva është një kundërshtar i fortë, por ne u përballëm edhe në ndeshjen e parë denjësisht me të, madje me pak fat, mund të kishim marrë edhe një barazim”, deklaroi Josa, ndërkohë që konfirmon se do të punojë për kampionatin vetëm pas përfundimit të ndeshjes së nesërme: “Do të filloj të mendoj për ndeshjen e radhës me Teutën vetëm pas mbrëmbjes të së enjtes”.
