Eurokomisioneri për Zgjerimin në Bashkimi Evropian Johanes Hahn ka përshëndetur miratimin e ligjit të dekriminalizimit një ditë më parë me konsensus në Parlament.
Hahn, ka theksuar në reagimin e tij shpërndarë për mediat se ky zhvillim legjislativ pritet të forcojë më tej shtetin ligjor, të rrisë integritetin e zyrtarëve publikë, të nxisë luftën kundër korrupsionit, të rrisë gjithashtu edhe besimin e qytetarëve te funksionimi i shtetit dhe tek institucionet e tij.
Hahn theksoi se përmes dialogut ndërpartiak është mënyra më e mirë për përmbushjen e reformave që i nevojiten vendit.
“E enjtja ishte një datë e rëndësishme për Parlamentin e Shqipërisë. Pas disa muajsh debate mes partive politike, anëtarët e Parlamentit miratuan ndryshimet kushtetuese dhe kuadrin e nevojshëm legjislativ për vendosjen e një disipline të qartë për përjashtimin e shkelësve penalë nga postet publike (i ashtuquajturi ligji i “dekriminalizimit”). BEja përsërit se Shqipëria po përballet me një numër sfidash shumë delikate të reformës që kërkojnë një dialog konstruktiv mes gjithë partive politike. Progresi i agjendës së reformave është i rëndësishëm për ta çuar vendin përpara në udhën e tij drejt integrimit evropian, si dhe për të garantuar më tej rrënjosjen e shtetit ligjor.” ka thënë Hahn.
