Fundjava e ka gjetur sërish monedhën europiane Euro në nivele tepër të ulëta në tregun e këmbimit valutor të vendit tonë.
Referuar tregut valutor 1 Euro këmbehet në shitje në vlerat e 100.9 Lekëve, ndërsa në blerje ka arritur në kufijtë e 100.1 lekëve.
Referuar të dhënave zyrtare të Bankës së Shqipërisë, kursi i këmbimit të Euros rezulton aktualisht në rënie me rreth 9.7% krahasuar me të njëjtën periudhë të vitit 2023.
Tendenca e rënies së monedhës europiane, nisi të tatëpjetën që nga fundi i tremujorit të parë të këtij viti. Sipas agjentëve të këmbimit valutor, kjo vjen kryesisht si rezultat i rritjes së prurjeve valutore që lidhen kryesisht edhe me fluksin turistik.
Gjithashtu sipas agjentëve, një ndikim të vogël ka edhe festa e Pashkëve ortodokse, që shoqërohet me një numër në rritje të emigrantëve që kthehen në Shqipëri, veçanërisht nga Greqia për të festuar.
Rënia e Euros po mban në nivele të ulëta edhe valutat e tjera kryesore. Dollari amerikan u këmbye këtë fundjavë në vlerat e 93-94 Lekëve, ndërsa paundi britanik 116.3 Lekë në blerje dhe 117.3 Lekë në shitje.
Duke parë tendencat e tregut dhe raportet e pritshme të kërkesës dhe ofertës, pritet që Leku të vijojë të forcohet, ndërsa monedhat e huaja, e veçanërisht Euro do vijojnë të jenë të brishta për shkak të turizmit.
/a.r
