Ish-udhëheqësi historik i ekstremit të djathtë francez, Jean-Marie Le Pen është shprehur në mbështetje të kandidaturës së Donald Trump-it në garën brenda kampit republikan për presidentin e ardhshëm në SHBA.
“Nëse do të isha një shtetas amerikan, unë do të votoja Donald Trump-in… ! u shpreh ai në platformën Twitter, eurodeputet dhe bashkëthemeluesi i partisë së Frontit Kombëtar (FN) 87 vjeçar, pa dhënë më tepër detaje.
Manjati i pasurive të patundshme, favoriti kryesor i paraprakeve të republikanëve ka publikuar disa qëndrime të diskutueshme për çështjen e migracionit dhe të fesë islame, duke propozuar edhe mbylljen e përkohshme të kufijve amerikanë për shtetasit e besimit mysliman.
Jean-Marie Le Pen, i mënjanuar nga FN-ja nga vajza e tij Marine Le Pen për shkak të provokimeve të përsëritura, është dënuar disa herë për qëndrimet e tij antisemitiste ose raciste.
