Sopranoja shqiptare Ermonela Jaho shkëlqeu me interpretimin e saj në operan “Madame Butterfly” në teatrin “Real” në Spanjë, ku arriti të njejtësohet aq shumë me veprën e Puçinit aq sa dukej sikur të vdiste vërtetë në skenë.
Kështu e nis kritikën Ruben Amon në gazetën më të rëndësishme spanjolle El Pais duke analizuar operan “Madame Butterfly” ku Ermonela Jaho interpretoi në rolin kryesor për disa netë me radhë.
Të qash në opera a është një dobësi? Me këtë pyetje gazetari spanjoll fton të futemi në thellësinë e një produksioni dhe interpretimi mbresëlënës të Ermonela Jahos në Teatrin Real në Madrid. Ermonela Jaho e shndërron “Butterfly” në një epidemi lotësh, psherëtimash dhe emocionesh. A duhet te emocionohet një artist, apo kjo do ta çonte në një udhë humbjeje? Njeriu i bën këto pyetje vetes pasi ka asistuar në zbulimin e Ermonela Jahos si protagoniste në Madame Butterfly në teatrin mbretëror.
E nuk flas për një zbulim me efekt surprizë, por thënë më mirë në pranimin e misterit. Mister që do të thotë se sopranoja shqiptare jepte përshtypjen se njësohej aq shumë në rolin e Cio Cio San sa na jepte ndjesinë se po dashuronte, vuante dhe ishte në agoni prej verteti.
Perceptojmë tragjedinë sikur të ishte duke ndodhur aty në skenë. Ky është vetëm një ekstrakt nga kritika e shkëlqyer që media spanjolle i ka dedikuar sopranos shqiptare pas suksesit në teatrin Real, ku opera u drejtua nga dirigjenti Marco Armiliato, ndërsa regjia nga Mario Gas.
Ndërsa vetë sopranoja Ermonela Jaho në një postim në rrjetin social Facebook, ku ka shpërndarë edhe shkrimin e gazetarit spanjoll shprehet se “është diçka e veçantë kur të falenderojnë në gjuhën tende… Faleminderit Spanja nga zemra për pritjen e ngrohtë”.
Opera “Madame Butterflu”do të shfaqet edhe në datat 12, 15, 19 , 21 korrik në Teatrin Real të Spanjës.
https://cultura.elpais.com/cultura/2017/07/08/recondita_armonia/1499502491_492889.amp.html
/b.d
