Deputetja shqiptare në parlamentin maqedonas Ermira Mehmeti ka folur për audio-përgjimin midis saj dhe ish-zëvendëskryeministrit të Maqedonisë Musa Xhaferri. Ajo ka folur në parlamentin shqiptar ku po mbahet takimi i parlamentareve gra të rajonit. Mehmeti tha se ajo u vu në një gjyq publik dhe u akuzua pasi ka dalë fituese në betejat e saj për një demokraci më të mirë, dhe për të drejtat e shqiptarëve në Maqedoni. Askush sipas saj nuk pyeti kush e montoi përgjimin, por vetëm e sulmuan.
“Pyetja e cila mua më ka ngacmuar është një: A ja vlen vërtetë të nderuara zonja që një femër të jetë politikisht aktive? Kam arritur që në një ambjent ende konservativ të jem fituese në një listë mazhoritare. Kam guxuar të flas hapur për nevojnë për demokraci të brendshme, dhe në fund duket se pagova një çmim jo të vogël. Më vendosën të banka e të akuzuarit për të thënë të gjitha të zezat. Askush nuk pyeti se si u bë që ky përgjim i montuar të përfshijë figurën time”, tha Mehmeti.
Më tej deputetja nuk arriti të kontrollojë dot emocionet dhe u përlot para kolegeve të saj. Mehmeti tha se është ende e tronditur.
“Akoma jam duke vuajtur traumën nga një goditje e vogël. Më falni për emocionet por kjo është paraqitja ime e parë publike pas asaj ngjarjeje”, tha Mehmeti.
