Liliana Hoxha, bashkëshortja e Sokolit, djalit të ish-udhëheqësit komunist, Enver Hoxha, ka dhënë ditën e sotme një intervistë për “Panorama”, ku rishpjegon edhe njëherë tjetër akuzat ndaj Nexhmije Hoxhës dhe Ramiz Alisë, se kanë vrarë Enver Hoxhën.
Mes të tjerash ajo është pyetur edhe se është ndjerë kur Ermal Hoxha, nipi i Enver Hoxhës, u arrestua si pjesë e një grupi trafiku të kokainës.
“U ndjemë të turpëruar. Po të ishte djali im, unë do ta kisha dënuar publikisht”, tha ajo.
Sa i përket vdekjes së Enver Hoxhës, ajo thotë:
“Për këtë çështje kemi dhe vërtetimin e Auron Tares: “Që në vitet ‘70 shërbimi inteligjent italian dispononte dosjen e shëndetit të Enver Hoxhës, e mundur kjo vetëm nëpërmjet mjekut më të afërt apo familjarit më të afërt, të vetmit që kishin akses për ta pasur në duar”.
Ky vërtetim arkivor përkon katërcipërisht me tezën që gjoja me paranojë ka parashtruar Nexhmije Hoxha, Ramiz Alia, Isuf Kalo e Sulo Gradeci, që në ’74 për synimin e Perëndimit: për vdekje të ngadalshme të Enver Hoxhës, nëpërmjet mjekimit me garanci mosdeshifrimi të helmimit edhe në rast autopsie. Për këtë duhej vepruar me medikamente të sigurta”.
