Nga Ferri në Parajsë! Mund të thuhet me plot gojën se kjo ka qenë kurba e çuditshme e ngjarjeve që i kanë çuar këngëtarët Ermal Meta dhe Fabrizio Moro drejt një suksesi sensacional në Festivalin e Sanremos. Në mesjavë ishin kandidatë për t’u përjashtuar, për shkak të akuzave për kopjim të këngës, kurse në fundjavë e shohin veten në majën e Olimpit të këngës italiane.
Kënga e tyre “Nuk na keni bërë asgjë”, me një tekst të fortë dhe linjë muzikore mjaft të gjetur, mroi mbi 50% të votave, mes tre finalistëve. Një fitore e padiskutueshme dhe e thellë për një këngë e cila fitoi të gjitha çmimet e audiencës së publikut italian, ende pa mbaruar Edicioni i 68 i Sanremos.
Një shqiptar ngjitet kështu në majën e skenës së Sanremos, duke gëzuar të gjithë bashkëqytetarët e tij në Shqipëri dhe Itali. Ermal Meta, i lindur në Fier dhe emigruar në moshë te re në vendin fqinjë, është sot një ndër firmat më të njohura të muzikës italiane. Sanremo që sonte flet edhe pak “shqip”!
