Terrorizmi nuk është vetëm një kërcënim ndaj një grupi të vogël kombesh apo vendesh, pasi ai është bërë një problem global dhe nuk kam asnjë dyshim se vendet anëtare të Organizatës së Bashkëpunimit Islamik (OBI) do të punojnë së bashku për të udhëhequr përpjekjet globale kundër terrorizmit, deklaroi sot presidenti turk, Recep Tayyip Erdogan në fjalimin e hapjes së këtij samiti, ku marrin pjesë mbi 30 shefa shtetesh dhe qeverish nga bota myslimane.
Erdogan tha se myslimanëve në Ballkan, Qipron Veriore, Azinë Juglindore dhe Afrikë u duhet mbështetja e botës islame.
“Ne duhet t’u ofrojmë mbështetje të fuqishme muslimanëve anembanë botës. Muslimanët në Republikën Turke të Qipros Veriore me dekada janë të izoluar. Ky është problem i të gjithë myslimanëve, njëkohësisht komunitetet myslimane në Ballkan, në Azinë Juglindore dhe në Afrikë kanë nevojë për mbështetje të fuqishme të botës islame”, theksoi Erdogan.
Presidenti turk i kërkoi komunitetit ndërkombëtar të rishikonte qëndrimin ndaj organizatave terroriste.
“Për shkak të kërcënimit të terrorizmit duhet të ndërmerren operacione në terren. Krahas kësaj, duhet edhe një luftë për t’i shterur burimet financiare dhe njerëzore. Për këtë arsye bashkëpunimi ndërkombëtar ka rëndësi të madhe. Do të jetë me vend që mes vendeve anëtare të OBI-së të krijohet një strukturë që do të forconte bashkëpunimin dhe institucionalizimin kundër terrorizmit dhe krimeve të tjera”, deklaroi Erdogan.
